January 12, 2022
January 12, 2022
ദോഹ : കായികലോകത്തെ ഏറ്റവും വലിയ മാമാങ്കങ്ങളിലൊന്നായ ഫുട്ബോൾ ലോകകപ്പിന് ആതിഥ്യമരുളാൻ തയ്യാറെടുക്കുകയാണ് ഖത്തർ. ഈ വർഷമവസാനം അരങ്ങേറുന്ന ഫുട്ബോൾ ലോകകപ്പ് വീക്ഷിക്കാൻ, സ്വന്തം രാജ്യമായ സ്പെയിനിൽ നിന്നും ആയിരക്കണക്കിന് കിലോമീറ്ററുകൾ അകലെയുള്ള ഖത്തറിലേക്ക് കാൽനടയാത്ര ആരംഭിച്ചിരിക്കുകയാണ് നാല്പത്തിരണ്ടുകാരനായ സാന്റിയാഗോ സാഞ്ചസ് കോഗെഡോർ.
സ്പെയിനിലെ ഖത്തർ അംബാസിഡറായ അബ്ദുള്ള ബിൻ ഇബ്രാഹിം അൽ ഹമറിന്റെ ആശിർവാദം സ്വീകരിച്ചാണ് താരം തന്റെ യാത്ര തുടങ്ങിയതെന്ന് സ്പാനിഷ് പത്രങ്ങൾ റിപ്പോർട്ട് ചെയ്തു. ഇത്തരമൊരു യാത്ര വ്യത്യസ്തമായ ഒരു അനുഭൂതി നൽകുമെന്നും, ഒട്ടേറെ കാര്യങ്ങൾ തനിക്ക് ഈ യാത്രയിൽ നിന്നും പഠിച്ചെടുക്കാൻ കഴിയുമെന്നാണ് പ്രതീക്ഷയെന്നും സാഞ്ചസ് അറിയിച്ചു. കായിക ഇനങ്ങളോട് ഏറെ താല്പര്യമുള്ള സാഞ്ചസ്, പത്ത് മാസത്തിലധികം ദൈർഘ്യമുള്ള കാൽനട യാത്രയ്ക്ക് ഒടുവിലാണ് ഖത്തറിൽ എത്തുക. വെള്ളം ശുചീകരിക്കാനുള്ള പ്രത്യേക ഗുളികകളും, താമസിക്കാനുള്ള ടെന്റും ഗ്യാസ് സ്റ്റവ്വും അടക്കമുള്ള മുന്നൊരുക്കങ്ങളോടെയാണ് സാഞ്ചസിന്റെ യാത്ര.