February 17, 2022
February 17, 2022
അജ്മാൻ : സ്കൂൾ ബസിൽ നിന്നും വീടിനടുത്ത് ഇറങ്ങിയ പെൺകുട്ടി അതേ ബസ്സിടിച്ച് മരിച്ചു. അജ്മാനിലെ ഉമ്മു അമ്മാർ സ്കൂളിലെ ശൈഖ ഹസൻ എന്ന പന്ത്രണ്ടുവയസുകാരിയാണ് അപകടത്തിൽ മരിച്ചത്. ഇന്നലെ വൈകീട്ട് നാല് മണിക്ക് അജ്മാനിലെ ഹമീദിയ പ്രദേശത്താണ് സംഭവം.
ക്ലാസ് കഴിഞ്ഞ് സ്കൂൾ ബസ്സിൽ തന്റെ വീടിനടുത്തിറങ്ങിയ ശൈഖ വീട്ടിലേക്കോടുന്നതിനിടെ ബസ്സിടിക്കുകയായിരുന്നു. തലയ്ക്ക് ഗുരുതര പരിക്കേറ്റ പെൺകുട്ടി ആശുപത്രിയിൽ എത്തിക്കുന്നതിന് മുൻപ് തന്നെ മരണത്തിന് കീഴടങ്ങി. ഡ്രൈവറുടെ അശ്രദ്ധയാണ് മരണകാരണമെന്ന് പ്രാഥമികാന്വേഷണത്തിൽ തെളിഞ്ഞതോടെ ഇയാളെ അറസ്റ്റ് ചെയ്തു. ബസ്സിൽ മറ്റ് ജീവനക്കാരോ സൂപ്പർവൈസർമാരോ ഉണ്ടായിരുന്നില്ലെന്നും സംഭവശേഷവും ഇയാൾ വാഹനമോടിച്ചെന്നും പോലീസ് കണ്ടെത്തി. യു.എ.ഇ പൊതുവിദ്യാഭ്യാസ സഹമന്ത്രി ജമീല അൽമുഹൈരി അനുശോചനം രേഖപ്പെടുത്തി. കുട്ടിയുടെ കുടുംബത്തിനും അധ്യാപകർക്കും ഉണ്ടായ ദുഃഖത്തിൽ പങ്കുചേരുന്നതായി അജ്മാൻ പോലീസും അറിയിച്ചു.
