October 20, 2021
October 20, 2021
ദോഹ : കായികമന്ത്രാലയവും ഖത്തർ സ്പോർട്സ് ഫെഡറേഷനും ചേർന്ന് സംഘടിപ്പിക്കുന്ന ദീർഘദൂര ഓട്ടമത്സരത്തിനുള്ള രജിസ്ട്രേഷൻ ആരംഭിച്ചു. ഡിസംബർ പത്തിന് നടക്കുന്ന ഈ മാരത്തൺ മത്സരത്തിൽ 90 കിലോമീറ്ററാണ് മത്സരാർത്ഥികൾ ഓടിയെത്തേണ്ടത്. പ്രൊഫഷണൽ താരങ്ങൾക്കും, സാധാരണക്കാർക്കും മത്സരത്തിൽ പങ്കെടുക്കാമെന്ന് കായികമന്ത്രാലയം വ്യക്തമാക്കി.
പതിനാറുമണിക്കൂറുകളോളം നീണ്ടുനിൽക്കുന്ന മത്സരത്തിൽ അഞ്ഞൂറോളം പേർ പങ്കെടുക്കുമെന്നാണ് സംഘാടകരുടെ പ്രതീക്ഷ. മികച്ച ആരോഗ്യസ്ഥിതിയും, കായികക്ഷമതയും ഉള്ളവർക്ക് മാത്രമേ ഓട്ടത്തിൽ പങ്കെടുക്കാൻ അനുമതി ലഭിക്കൂ. ആറ് പേർ അടങ്ങുന്ന സംഘമായോ, ഒറ്റയ്ക്കോ മത്സരത്തിന് പേര് നൽകാം. രജിസ്റ്റർ ചെയ്യാനുള്ള സംവിധാനം സ്പോർട്സ് ഫെഡറേഷൻ വഴി ഒരുക്കിയിട്ടുണ്ടെന്നും സംഘാടകർ കൂട്ടിച്ചേർത്തു. ഷെറാട്ടൻ പാർക്ക് മുതൽ ദുഖാൻ ബീച്ച് വരെയാവും മത്സരം സംഘടിപ്പിക്കുക. ഇതിനിടെ അഞ്ചുകേന്ദ്രങ്ങളിൽ മത്സരാർത്ഥികൾക്ക് വിശ്രമിക്കാനും, ഭക്ഷണത്തിനും സൗകര്യം ഒരുക്കും. പുലർച്ചെ 4:30 മുതൽ രാത്രി 8:30 വരെ നീളുന്ന മത്സരത്തിൽ ഉടനീളം ആംബുലൻസിന്റെയും ആരോഗ്യവിദഗ്ധരുടെയും സേവനം ലഭ്യമായിരിക്കും. ഖത്തർ മാരത്തണിന്റെ കഴിഞ്ഞ പതിപ്പിൽ 44 രാജ്യങ്ങളിൽ നിന്നായി 425 പേരാണ് പങ്കെടുത്തത്.