September 16, 2019
September 16, 2019
ദോഹ: റാസ് അൽ നൗഫ്,തിന്ബക് ഇന്റര്ചേഞ്ചുകള് ഗതാഗതത്തിനു തുറന്നുകൊടുത്തു. അല്ഖോര് റോഡ് പ്രോജക്ടിന്റെ ഭാഗമായാണ് ഇരു ഇന്റര്ചേഞ്ചുകളും പൊതുമരാമത്ത് അതോറിറ്റി അശ്ഗാല് ഗതാഗതത്തിനു സജ്ജമാക്കിയത്.പൊതുമരാമത്ത് വകുപ്പിന്റെ പ്രധാന പദ്ധതികളിലൊന്നായ അൽഖോർ റോഡ് പദ്ധതിയുടെ 92 ശതമാനം നിർമാണ ജോലികളും പൂർത്തിയായതോടെയാണിത്.
2022 ലോകകപ്പിനു മുന്നോടിയായി വിവിധ സ്റ്റേഡിയങ്ങള്ക്കിടയിലെ സഞ്ചാരം എളുപ്പമാക്കാൻ ലക്ഷ്യമിട്ട് അതോറിറ്റി നടത്തുന്ന ശ്രമങ്ങളുടെ തുടര്ച്ചയായാണ് പുതിയ ഇന്റര്ചേഞ്ചുകള് തുറന്നിരിക്കുന്നത്. ഖത്തറിലെ വാണിജ്യ-തന്ത്രപ്രധാന മേഖലകളെ കൂടുതല് ബന്ധിപ്പിക്കുകയും പദ്ധതി വഴി ലക്ഷ്യമിടുന്നു. അല്ഖോര് പാതയുടെ വടക്കായാണ് പുതിയ ഇന്റര്ചേഞ്ചുകള് സ്ഥിതി ചെയ്യുന്നത്. വിവിധ താമസ കേന്ദ്രങ്ങള്, പ്രധാനപ്പെട്ട സ്ഥാപനങ്ങള്, സാമ്പത്തിക-കായിക-വിനോദകേന്ദ്രങ്ങള് തുടങ്ങിയവയെ ഇവ ബന്ധിപ്പിക്കുന്നു. റാസൽ അഫാന്, റാസ് അൽ നൗഫ്, തിന്ബക്, അല്ബൈത്ത് സ്റ്റേഡിയം എന്നിവ ഇതില് പ്രധാനപ്പെട്ടവയാണ്.
ലോകകപ്പ് ഒരുക്കങ്ങളുടെ മേല്നോട്ടം വഹിക്കുന്ന ഡെലിവറി ആന്ഡ് ലെഗസി സുപ്രീം കമ്മിറ്റിയുടെ പ്രതിനിധികളുടെ സാന്നിധ്യത്തിലാണ് ഇന്റര്ചേഞ്ചുകള് തുറന്നത്. ട്രാഫിക് ജനറല് ഡയരക്ടറേറ്റ്,റാസ് അൽ അഫാന് ഇന്ഡസ്ട്രിയല് സിറ്റിയിലെ പ്രമുഖരും അശ്ഗാല്, കോണ്ട്രാക്ടിങ് കമ്പനി എന്ജിനീയര്മാരും ചടങ്ങില് സംബന്ധിച്ചു.