September 09, 2022
September 09, 2022
ദോഹ : ഏറ്റവും കൂടുതൽ കാലം ബ്രിട്ടീഷ് ഭരണാധികാരിയായിരുന്ന എലിസബത്ത് രാജ്ഞിയുടെ നിര്യാണത്തിൽ ഖത്തർ അമീർ ശൈഖ് തമീം ബിൻ ഹമദ് അൽതാനി അനുശോചിച്ചു. രാജ്ഞിയുടെ വിയോഗത്തിൽ ബ്രിട്ടീഷ് രാജകുടുംബത്തിനും ബ്രിട്ടനിലെ ജനങ്ങൾക്കും അഗാധമായ അനുശോചനം അറിയിക്കുന്നതായി അമീർ ഔദ്യോഗിക ട്വിറ്റർ അക്കൗണ്ടിൽ രേഖപ്പെടുത്തി.
എലിസബത്ത് രാജ്ഞിയുടെ നിര്യാണത്തിൽ ബ്രിട്ടീഷ് രാജകുടുംബത്തിനും ബ്രിട്ടനിലെ ജനങ്ങൾക്കും ആത്മാർത്ഥമായ അനുശോചനം രേഖപ്പെടുത്തുന്നു.ലോകത്തിന് മഹത്തായ ഒരു മനുഷ്യപ്രതീകമാണ് രാജ്ഞിയുടെ വിയോഗത്തിലൂടെ നഷ്ടപ്പെട്ടത്. തിരക്കേറിയ ഔദ്യോഗിക ജീവിതത്തിനിടയിലും പ്രചോദനത്തിന്റെയും കുലീനതയുടെയും ഉറവിടമായിരുന്നു എലിസബത്ത് രാജ്ഞിയെന്നും, ഖത്തറുമായി അവർക്കുണ്ടായിരുന്ന സുദൃഢവും ക്രിയാത്മകവുമായ അടുപ്പം ഇരു ജനതകൾക്കുമിടയിൽ സൗഹൃദവും പങ്കാളിത്തവും ശക്തിപ്പെടുത്തിയതായും അനുശോചന സന്ദേശത്തിൽ ഖത്തർ അമീർ രേഖപ്പെടുത്തി.
ആരോഗ്യ നില മോശമായതിനെ തുടർന്ന് ഇന്നലെയാണ് എലിസബത്ത് അലക്‌സാൻഡ്ര മേരി വിൻഡ്‌സർ എന്ന എലിസബത്ത് രാജ്ഞി (96) അന്തരിച്ചത്. രാജകുടുബം തന്നെയാണ് രാജ്ഞിയുടെ മരണം സ്ഥിരീകരിച്ചത്.ഡോക്ടർമാരടങ്ങിയ വിദഗ്ദ്ധ സംഘത്തിന്റെ നിരീക്ഷണത്തിൽ സ്‌കോട്ട്ലൻറിലെ ബാൽമോർ കൊട്ടാരത്തിലായിരുന്നു അന്ത്യം.മകൻ ചാൾസ് രാജകുമാരനായിരിക്കും അടുത്ത ചക്രവർത്തി.
പിതാവ് ജോർജ്ജ് ആറാമന്റെ മരണത്തെത്തുടർന്ന് 1952 ഫെബ്രുവരി 6നാണ് അവർ അധികാരത്തിലെത്തിയത്.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ https://chat.whatsapp.com/HrLcaJxM8ioJZfNN9bsdpq എന്ന ലിങ്കിൽ ജോയിൻ ചെയ്യുക
