November 10, 2021
November 10, 2021
അബുദാബി: തണുപ്പുകാലം വരവായതോടെ വാഹനങ്ങളുടെ ചില്ലുകൾ താഴ്ത്തിവെച്ച്, ഉയർന്ന ശബ്ദത്തിൽ പാട്ടുവെയ്ക്കുന്ന പ്രവണത കൂടിവരികയാണ് അബുദാബിയിൽ. ഇത്തരക്കാർക്കെതിരെ കർശന നടപടികൾ സ്വീകരിക്കുമെന്ന് വ്യക്തമാക്കി രംഗത്തെത്തിയിരിക്കുകയാണ് അബുദാബി പോലീസ്. ജോലി കഴിഞ്ഞ് വിശ്രമിക്കുന്നവർക്കും, വയോധികർക്കും ഈ കലാപരിപാടി കാരണം ബുദ്ധിമുട്ട് നേരിടുന്നുണ്ടെന്ന് പരാതികൾ ലഭിച്ചതിനെ തുടർന്നാണ് നടപടി.
2000 ദിർഹം പിഴയും, 12 ബ്ലാക്ക് പോയിന്റുമാണ് ഉച്ചത്തിൽ സംഗീതം ആസ്വദിക്കുന്നവർക്കുള്ള പിഴ. ശബ്ദം കൂട്ടാൻ വേണ്ടി വാഹനത്തിന്റെ എഞ്ചിനിൽ മാറ്റങ്ങൾ വരുത്തിയതായി ശ്രദ്ധയിൽ പെട്ടാൽ 1000 ദിർഹം പിഴയും 12 ബ്ലാക്ക് പോയിന്റും ലഭിക്കും. ഇതോടൊപ്പം, 30 ദിവസത്തേക്ക് വാഹനം പോലീസ് പിടിച്ചെടുക്കുകയും ചെയ്യും. നിയമം ലംഘിക്കുന്നവരെ പിടികൂടി പിഴ ചുമത്തുമെന്ന് പോലീസ് പെട്രോളിംഗ് ഉപമേധാവി ബ്രിഗേഡിയർ സാലിം അബ്ദുള്ള ബിൻ ബറാക് അൽ അമിരി അറിയിച്ചു.
