April 04, 2022
April 04, 2022
അബുദാബി : റമദാൻ മാസം പ്രമാണിച്ച് സൗജന്യ ഭക്ഷ്യകിറ്റുകൾ വിതരണം ചെയ്യുന്നുവെന്ന പേരിൽ ഓൺലൈൻ തട്ടിപ്പ് സജീവമായതായി അബുദാബി സൈബർ സുരക്ഷാ അധികൃതർ. വാട്സപ്പിലൂടെ, 'റമദാൻ റിലീഫ് പാക്കേജ്' എന്ന പേരിലാണ് തട്ടിപ്പിന് കളമൊരുങ്ങുന്നത്. ആട്ട, മൈദ, അരി തുടങ്ങിയ നിത്യോപയോഗ സാധനങ്ങൾ വീട്ടിൽ എത്തിച്ചുനൽകുമെന്നതാണ് ലിങ്കിലെ ഉള്ളടക്കം.
സാധനങ്ങൾക്കായി ലിങ്കിലൂടെ അപേക്ഷിക്കാമെന്ന അറിയിപ്പും കൂടെയുണ്ട്. ഈ ലിങ്കിൽ ക്ലിക്ക് ചെയ്താലുടൻ മൊബൈൽ നമ്പർ രേഖപ്പെടുത്താൻ ആവശ്യപ്പെടും. പിന്നാലെ, ഒടിപി നമ്പർ രേഖപ്പെടുത്താനുള്ള അപേക്ഷയും വരും. രജിസ്റ്റർ ചെയ്യാനുള്ള ഒടിപി ആണെന്ന് തെറ്റിദ്ധരിച്ച് ഒടിപി നൽകിയാലുടൻ തട്ടിപ്പ് സംഘം ബാങ്ക് വിവരങ്ങൾ കൈക്കലാക്കുകയും പണം തട്ടുകയും ചെയ്യും. സർക്കാർ അംഗീകൃത സർവീസ് ആണിതെന്ന് വെബ്സൈറ്റിൽ നൽകിയിട്ടുണ്ടെങ്കിലും കൂടുതൽ വിവരങ്ങൾ ലഭ്യമല്ല. ഇത്തരത്തിൽ കൈക്കലാക്കുന്ന വ്യക്തിഗത വിവരങ്ങൾ ഉപയോഗിച്ച് ബ്ലാക്ക് മെയിലിങ് ചെയ്തേക്കാമെന്നും അധികൃതർ മുന്നറിയിപ്പ് നൽകിയിട്ടുണ്ട്.