October 30, 2021
October 30, 2021
ദോഹ : 2021-2022 വർഷത്തെ അക്കാദമിക്ക് കലണ്ടറിൽ മാറ്റങ്ങൾ വരുത്തില്ലെന്നും, ക്ലാസുകളും പരീക്ഷകളും മുൻപ് നിശ്ചയിച്ച തീയതികളിൽ തന്നെ നടക്കുമെന്നും ഖത്തർ ഉന്നതവിദ്യാഭ്യാസവകുപ്പ് അറിയിച്ചു. കലണ്ടറിൽ മാറ്റങ്ങൾ വന്നേക്കുമെന്ന അഭ്യൂഹങ്ങൾ സമൂഹമാധ്യമങ്ങളിൽ പ്രചരിച്ചതിന് പിന്നാലെയാണ് ട്വിറ്ററിലൂടെ മന്ത്രാലയം ഔദ്യോഗിക കുറിപ്പ് പുറത്തുവിട്ടത്.
ഔദ്യോഗികവാർത്താ ഏജൻസികളിൽ നിന്നും, അധികൃതരിൽ നിന്നും ഉളള വാർത്തകൾ മാത്രമേ ശ്രദ്ധിക്കാവൂ എന്ന മുന്നറിയിപ്പും അധികൃതർ നൽകിയിട്ടുണ്ട്. 10, 11, 12 ക്ലാസുകളുടെ ഒന്നാം സെമസ്റ്റർ പരീക്ഷ ഡിസംബർ ഒന്ന് മുതൽ പന്ത്രണ്ട് വരെയും, 1 മുതൽ 9 വരെയുള്ള ക്ലാസുകളുടെ പരീക്ഷ ഡിസംബർ ഒന്ന് മുതൽ ഒൻപതാം തിയ്യതി വരെയും നടക്കും. ഡിസംബർ 19 മുതൽ 30 വരെ അർദ്ധവാർഷിക അവധി നൽകുമെന്നും അധികൃതർ കൂട്ടിച്ചേർത്തു. ജനുവരി 2, 2022 നാണ് ക്ലാസുകൾ പുനരാരംഭിക്കുക.