December 21, 2021
December 21, 2021
ദോഹ : ഖത്തറിലെ അൽ വാബ്‌ സ്ട്രീറ്റിൽ പുതിയ രണ്ട് റോഡുകൾ കൂടി ഗതാഗതത്തിന് സജ്ജമാകും. പൊതുമരാമത്ത് വകുപ്പായ അഷ്‌ഗാൽ, ട്വിറ്ററിലൂടെയാണ് ഇക്കാര്യം അറിയിച്ചത്. ബായ ജംക്ഷനിലെ റോഡ് ഡിസംബർ 25 ശനിയാഴ്ചയും, ഖലീഫ ഒളിമ്പിക് സിറ്റി ജംക്ഷനിലെ റോഡ് ഡിസംബർ 31 വെള്ളിയാഴ്ചയും പൊതുഗതാഗതത്തിനായി തുറന്നുകൊടുക്കും.
പുതിയ റോഡുകൾ തുടങ്ങുന്നതോടെ അൽ അസീസിയ, അൽ വാബ്‌, മെഹർജ, മുറയ്ഖ്, മുഅതിർ എന്നിവിടങ്ങളിലേക്ക് റോഡ് മാർഗം സഞ്ചരിക്കുന്നവർക്ക് ട്രാഫിക്ക് തിരക്കിൽ നിന്നും ആശ്വാസം ലഭിക്കും. ആസ്പയർ സോണിലെയും ഖലീഫ ഇന്റർനാഷണലിലെയും വ്യാപാരസമുച്ചയങ്ങളെ ബന്ധിപ്പിക്കാനും പുതിയ റോഡുകളിലൂടെ സാധിക്കും. അൽ വക്ര റോഡിലേക്ക് ഇബ്നു സീൻ സ്ട്രീറ്റിൽ നിന്നും പ്രവേശിക്കാനുള്ള റോഡ് ഒരുമാസക്കാലത്തേക്ക് അടച്ചിടുമെന്നും അഷ്‌ഗാൽ അറിയിച്ചു. ഡിസംബർ 21 (ഇന്ന്) മുതൽ ജനുവരി 20 വരെയാണ് ഈ റോഡ് അടയ്ക്കുക. യാത്രക്കാർക്ക് അൽ സുവൈർ സ്ട്രീറ്റിലെ റോഡിലൂടെ ലക്ഷ്യസ്ഥാനങ്ങളിൽ എത്താമെന്നും അഷ്‌ഗാൽ അറിയിച്ചു.
