April 01, 2022
April 01, 2022
ദുബായ് : റോഡ് സുരക്ഷ ഉറപ്പുവരുത്താൻ പുതിയ നടപടികളുമായി ദുബായ് എമിറേറ്റ്‌. സൈക്കിളുകൾ, സ്കൂട്ടറുകൾ, ഇലക്ട്രിക് ബൈക്കുകൾ തുടങ്ങിയയുടെ ഉപയോഗത്തിനാണ് പുതിയ മാർഗനിർദേശങ്ങൾ പ്രഖ്യാപിച്ചത്. ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ്‌ ബിൻ റാഷിദ്‌ അൽ മക്തൂം അടുത്തിടെ പുറപ്പെടുവിച്ച എക്സിക്യൂട്ടീവ് കൗൺസിൽ പ്രമേയം പ്രകാരമാണ് റോഡുകളിൽ പുതിയ നിയമങ്ങൾ അവതരിപ്പിക്കുന്നത്.
നിയമം ലംഘിച്ചതായി ശ്രദ്ധയിൽ പെട്ടാൽ പിഴയോ, വാഹനം കണ്ടുകെട്ടൽ അടക്കമുള്ള നടപടികളോ നേരിടേണ്ടി വരും. ഇലക്ട്രിക് സ്കൂട്ടറുകൾക്കും ഇനി ലൈസൻസ് വേണമെന്നതാണ് പുതിയ നിയമങ്ങളിൽ പ്രധാനപ്പെട്ടത്. 16 വയസിൽ താഴെയുള്ളവർക്ക് ഇലക്ട്രിക് ബൈക്കോ സ്കൂട്ടറോ ഓടിക്കാൻ അനുമതിയില്ലെന്നും റോഡ്സ് ആൻഡ് ട്രാൻസ്‌പോർട്ട് അതോറിറ്റി വ്യക്തമാക്കി. 12 വയസിൽ താഴെയുള്ള കുട്ടികൾ സൈക്ലിങ്ങിൽ ഏർപ്പെടുമ്പോൾ, 18 വയസ്സ് പിന്നിട്ട ഒരാൾ കൂടെ ഉണ്ടാവണമെന്നും ആർ.ടി.ഐ നിർദ്ദേശിച്ചു. കൂട്ടമായി സൈക്ലിങ് നടത്തുന്നവർ മുൻ‌കൂർ അനുമതി നേടേണ്ടതുണ്ട്. നാളിലധികം ആളുകൾ ഉള്ള സംഘങ്ങൾക്ക് ഈ ഉത്തരവ് ബാധകമാണ്. നിയമങ്ങൾ ലംഘിക്കുന്നത് 18 വയസിൽ താഴെ പ്രായമുള്ളവരാണെങ്കിൽ രക്ഷിതാവ് പിഴ ഒടുക്കേണ്ടി വരും.
