December 27, 2021
December 27, 2021
അബുദാബി : കഴിഞ്ഞ ഏതാനും മാസങ്ങളായി ജോലിയും ശമ്പളവുമില്ലാതെ ദുരിതക്കയത്തിലായ തൊഴിലാളികൾക്ക് കോടതി ഇടപെടൽ ആശ്വാസമായി. 4 കമ്പനികളിലെ മലയാളികൾ ഉൾപ്പെടെയുള്ള 2794 തൊഴിലാളികൾക്കാണ് മൊബൈൽ കോടതിയുടെ വിധി പ്രകാരം കിട്ടാനുള്ള ശമ്പളകുടിശ്ശിക ലഭിച്ചത്. 4 കോടി ദിർഹമായിരുന്നു കമ്പനികളിൽ നിന്ന് ഇവർക്ക് ലഭിക്കാനുള്ളത്.
കമ്പനി അധികൃതരുമായി ചർച്ച നടത്തി പ്രശ്നം പരിഹരിച്ച കോടതി, ഓരോ തൊഴിലാളികളുടെയും പരാതി കേൾക്കാനും തയ്യാറായി. നേരത്തെ, തൊഴിലാളികളെ അവരുടെ പാർപ്പിടത്തിൽ നിന്ന് കമ്പനികൾ ഇറക്കിവിടാൻ ശ്രമിച്ചപ്പോഴും കോടതി ഇടപെടൽ നടത്തിയിരുന്നു. അബുദാബി വിടുന്നത് വരെ തൊഴിലാളികളുടെ സുരക്ഷ ഉറപ്പുവരുത്തിയ കോടതി, മറ്റ് ജോലികളിലേക്ക് മാറാൻ ആഗ്രഹിക്കുന്നവർക്ക് അതിനുള്ള സാഹചര്യം ഒരുക്കുമെന്നും അറിയിച്ചു. ഒരിക്കലും ലഭിക്കില്ലെന്ന് കരുതിയ തുക ലഭിച്ചതിൽ സന്തോഷം രേഖപ്പെടുത്തിയ തൊഴിലാളികൾ, കോടതിക്കും തൊഴിൽ മന്ത്രാലയ ഉദ്യോഗസ്ഥർക്കും നന്ദി രേഖപ്പെടുത്തി. ഇവരിൽ പലരും നാട്ടിലേക്ക് മടങ്ങാനുള്ള തയ്യാറെടുപ്പിലാണ്.