March 16, 2022
March 16, 2022
ദുബായ് : ഗ്ലോബൽ വില്ലേജിൽ നൃത്തചുവടുകളിലൂടെ വിസ്മയം തീർത്ത മലയാളി ഡോക്ടർമാരുടെ കൂട്ടായ്മക്ക് റെക്കോർഡ് തിളക്കം. യു.എ.ഇ യുടെ വിവിധ എമിറേറ്റുകളിലായി ജോലിചെയ്യുന്ന, അൻപതോളം മലയാളി ഡോക്ടർമാർ അടങ്ങിയ സംഘമാണ് ഫ്യൂഷൻ നൃത്തത്തിലൂടെ ലണ്ടൻ വേൾഡ് ബുക്ക് ഓഫ് റെക്കോർഡ്സും, അറേബ്യൻ വേൾഡ് റെക്കോർഡ്സും തിരുത്തിയെഴുതിയത്.
ഒരേസമയം കൂടുതൽ വനിതാ ഡോക്ടർമാർ പാരമ്പര്യനൃത്തം അവതരിപ്പിച്ചെന്ന റെക്കോർഡാണ് ഇവർ സ്വന്തമാക്കിയത്. രാജസ്ഥാൻ നാടോടി നൃത്ത ഇനമായ ഗുമർ, അറബിക് പ്രാദേശിക നൃത്തമായ ഖലീജി എന്നിവയാണ് ഇവർ അവതരിപ്പിച്ചത്. സംഘത്തിന്റെ പ്രകടനം പത്തുമിനിറ്റിലധികം നീണ്ടുനിന്നു. 'നസീജ്' എന്ന പേരിൽ നടത്തിയ പരിപാടി, മെഡിക്കോൺ ഇവന്റ്സ് ആണ് സംഘടിപ്പിച്ചത്. 75 ആം സ്വാതന്ത്ര്യദിനവാർഷികം ആഘോഷിക്കുന്ന ഇന്ത്യക്കും, അൻപതാം ദേശീയ ദിനം ആചരിക്കുന്ന യു.എ.ഇ. ക്കും പരിപാടിയിൽ ആദരമർപ്പിച്ചു.