March 09, 2020
March 09, 2020
കുവൈത്ത് സിറ്റി: കോവിഡ് വൈറസ് വ്യാപനത്തെ തുടർന്ന് കുവൈത്തിലെ വിദ്യാഭ്യാസ സ്ഥാപനങ്ങൾക്ക് അനുവദിച്ചിരുന്ന അവധി രണ്ടാഴ്ച കൂടി നീട്ടി. സര്‍ക്കാര്‍, സ്വകാര്യ വിദ്യാലയങ്ങൾക്ക് അവധി ബാധകമായിരിക്കും. തിങ്കളാഴ്ച വൈകീട്ട് ചേര്‍ന്ന മന്ത്രിസഭാ യോഗമാണ് തീരുമാനമെടുത്തത്. ദേശീയ ദിനാഘോഷം കഴിഞ്ഞ് മാര്‍ച്ച്‌ ഒന്നിന് തുറക്കേണ്ട സ്വകാര്യ, സര്‍ക്കാര്‍ സ്കൂളുകള്‍ നിലവിലെ തീരുമാനപ്രകാരം മാര്‍ച്ച്‌ 15നാണ് തുറക്കാന്‍ നിശ്ചയിച്ചിരുന്നത്. വൈറസ് ആഗോളതലത്തിൽ വ്യാപകമാവുകയും കുവൈത്തില്‍ കോവിഡ് 19 ബാധിതരുടെയും നിരീക്ഷണത്തിലുള്ളവരുടെയും എണ്ണത്തില്‍ വർധനവുണ്ടാവുകയും ചെയ്തതോടെയാണ് അവധി നീട്ടിയത്.
ഒരുമാസത്തിലേറെ അവധി നല്‍കേണ്ടി വരുമ്പോഴുള്ള അക്കാദമിക് പ്രതിസന്ധി മറികടക്കാന്‍ ഈ വര്‍ഷം കരിക്കുലം വെട്ടിക്കുറക്കുന്നതും പരീക്ഷക്ക് ശേഷമുള്ള പൊതു അവധി റദ്ദാക്കുന്നതും ഉള്‍പ്പെടെയുള്ള സാധ്യതകള്‍ അധികൃതര്‍ പരിഗണിക്കുന്നതായാണ് റിപ്പോർട്ട്. സ്കൂളുകള്‍ വഴി കൊറോണ പരന്നാല്‍ സ്ഥിതി നിയന്ത്രണാതീതമാവുമെന്ന വിലയിരുത്തലിന്റെ അടിസ്ഥാനത്തിലാണ് ഇക്കാര്യത്തില്‍ പരീക്ഷണത്തിന് നില്‍ക്കേണ്ടെന്ന് മന്ത്രാലയം തീരുമാനിച്ചത്. സ്കൂള്‍ തുറന്നാലും സുരക്ഷ ഉറപ്പുവരുത്താനാവശ്യമായ എല്ലാ നടപടികളും സ്വീകരിക്കണമെന്ന് ഡയറക്ടര്‍മാര്‍ക്ക് നിര്‍ദേശം നല്‍കിയിട്ടുണ്ട്.
