June 16, 2020
June 16, 2020
കുവൈത്ത് സിറ്റി : കുവൈത്തിലെ വിവിധ പ്രവിശ്യകളിൽ ഏർപെടുത്തിയ കോവിഡ് നിയന്ത്രണങ്ങളിൽ കൂടുതൽ ഇളവുകൾ അനുവദിക്കുന്നതിനുള്ള മാർഗനിർദേശങ്ങൾക്ക് മിനിസ്റ്റേഴ്‌സ് കൗൺസിൽ അംഗീകാരം നൽകി. കോവിഡ് വ്യാപനത്തിന്റെ തോത് കുറഞ്ഞു വരുന്ന സാഹചര്യത്തിൽ പൊതുജനാരോഗ്യ മന്ത്രാലയത്തിന്റെ നിർദേശപ്രകാരം വിവിധ ഘട്ടങ്ങളിലായി ജനജീവിതം സാധാരണ നിലയിലാക്കുന്നതിന്റെ ഭാഗമായാണ് നടപടി. ഇപ്പോഴും നിയന്ത്രണങ്ങൾ നിലനിൽക്കുന്ന മേഖലകളിലെ നിയന്ത്രണങ്ങൾ നീക്കുന്നതിനെ പറ്റി ചർച്ച ചെയ്ത മന്ത്രിസഭ, ഇക്കാര്യത്തിൽ അന്തിമ തീരുമാനം വ്യാഴാഴ്ച്ച എടുക്കുമെന്നറിയിച്ചു.
ഹവാലി, ഖൈതാൻ,ഫർവാനിയ, ജലീബ് അൽ ശുയൂഖ്, മഹ്ബൂല തുടങ്ങിയ നഗരങ്ങളിലാണ് ഇപ്പോഴും നിയന്ത്രണങ്ങൾ നിലനിൽക്കുന്നത്.മാർഗനിർദേശങ്ങൾ പാലിച്ചുകൊണ്ട് മൂന്നു ഘട്ടങ്ങളിലായി ഈ പ്രദേശങ്ങളിൽ ഇളവനുവദിക്കുമെന്നാണ് അറിയിച്ചിരുന്നത്. ഇതിൽ രണ്ടും മൂന്നും ഘട്ടങ്ങളിലെ ഇളവുകൾ സംബന്ധിച്ച മാർഗനിർദേശങ്ങൾക്കാണ് കൗൺസിൽ അംഗീകാരം നൽകിയത്. വ്യാഴാഴ്ച്ച ചേരുന്ന കാബിനറ്റ് യോഗത്തിന് മുൻപ് ഇതുസംബന്ധിച്ച വിശദമായ റിപ്പോർട്ട് സമർപ്പിക്കും.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക
