January 24, 2022
January 24, 2022
ദോഹ : ഖത്തറിൽ കോവിഡ് രോഗികളുടെ ഐസൊലേഷൻ കാലയളവ് ഏഴ് ദിവസമായി കുറച്ചതായി ആരോഗ്യ മന്ത്രാലയം അറിയിച്ചു. കോവിഡ് രോഗികൾക്ക് അനുവദിച്ചു നൽകുന്ന രോഗകാല അവധികളുടെ എണ്ണവും ഏഴാക്കി പുനർനിശ്ചയിച്ചിട്ടുണ്ട്. നേരത്തേ പത്ത് ദിവസമായിരുന്നു കോവിഡ് രോഗികൾ ഐസൊലേഷനിൽ കഴിയേണ്ടത്.
രോഗികൾ ഏഴാമത്തെ ദിവസം അംഗീകൃത കേന്ദ്രത്തിൽ കോവിഡ് പരിശോധന നടത്തണം. ഈ പരിശോധനയിൽ നെഗറ്റീവ് ആയാൽ ഇഹ്തിറാസ് ആപ്പിലെ സ്റ്റാറ്റസ് പച്ചയാവുകയും, പിറ്റേന്ന് മുതൽ ജോലിയിൽ പ്രവേശിക്കാനും കഴിയും. ഏഴാം ദിനം നടത്തുന്ന ഈ പരിശോധന പോസിറ്റീവ് ആയാൽ മൂന്ന് ദിവസങ്ങൾ കൂടി ഐസൊലേഷനിൽ കഴിയണം. ഈ വ്യക്തികൾക്ക് മൂന്ന് ദിവസം കൂടി രോഗകാല അവധി അനുവദിക്കും. പതിനൊന്നാം ദിവസം ടെസ്റ്റ്‌ ഇല്ലാതെ തന്നെ പുറത്തിറങ്ങുകയും, ജോലിയിൽ പ്രവേശിക്കുകയും ചെയ്യാം. ഏഴാം ദിവസം ആവുമ്പോഴേക്കും ഭൂരിഭാഗം പേരും കോവിഡിൽ നിന്ന് മുക്തരാവുന്നുണ്ടെന്ന് ശാസ്ത്രീയമായ തെളിവുകൾ ലഭിച്ചതിനാലാണ് മാനദണ്ഡം മാറ്റിയതെന്ന് ആരോഗ്യ മന്ത്രാലയം അറിയിച്ചു. അതേസമയം, ഐസൊലേഷൻ അവസാനിച്ചാലും മാസ്കും സാമൂഹിക അകലവും അടക്കമുള്ള പ്രതിരോധ മാർഗങ്ങൾ അവലംബിക്കണമെന്നും ആരോഗ്യമന്ത്രാലയം വ്യക്തമാക്കി.
