August 27, 2021
August 27, 2021
അബുദാബി : വിദ്യാഭ്യാസരംഗത്ത് ഏറെ പ്രധാനപ്പെട്ടൊരു കരാറിൽ ഒപ്പുവെച്ചിരിക്കുകയാണ് ഇന്ത്യയും യുഎഇയും. ഇന്ത്യൻ കൗൺസിൽ ഫോർ കൾച്ചറൽ റിലേഷൻസും (ICCR), ന്യൂയോർക്ക് യൂണിവേഴ്സിറ്റി അബുദാബിയും (NYUAD) തമ്മിൽ ഉണ്ടാക്കിയ കരാർ പ്രകാരം ഇന്ത്യൻ യൂണിവേഴ്സിറ്റിയിലെ പ്രൊഫസർമാർ ഓരോ വർഷവും ആറ് മുതൽ പത്ത് മാസം വരെ അബുദാബിയിൽ ചിലവഴിക്കും.ഇതുവഴി ഗവേഷണത്തിലും സാമൂഹ്യശാസ്ത്ര അധ്യാപനത്തിലും ഇവരുടെ സേവനം അബുദാബിക്ക് ഉപയോഗിക്കാം.
ന്യൂയോർക്ക് യൂണിവേഴ്സിറ്റി അബുദാബിയും, ഇന്ത്യൻ എംബസിയും സംയുക്തമായി പത്രക്കുറിപ്പിലൂടെയാണ് കരാർ വിവരങ്ങൾ പുറത്തുവിട്ടത്. യുഎഇ പ്രവാസികളിൽ സിംഹഭാഗവും ഇന്ത്യക്കാരായതിനാൽ ഈ നീക്കം ഇരുകൂട്ടർക്കും ഗുണം ചെയ്യുമെന്നാണ് പ്രതീക്ഷയെന്നും NYUAD അറിയിച്ചു. ഗൾഫ് മേഖലയിലെ ഒരു യൂണിവേഴ്സിറ്റിയുമായി ചരിത്രത്തിൽ ആദ്യമായാണ് ഇത്തരമൊരു കരാറിൽ രാജ്യം ഒപ്പിടുന്നതെന്ന് ഐസിസിആറിനെ പ്രതിനിധീകരിച്ച് കരാറിൽ ഒപ്പിട്ട ഇന്ത്യൻ അംബാസിഡർ പവൻ കപൂർ പറഞ്ഞു.