February 03, 2022
February 03, 2022
ദോഹ : ഖത്തറിൽ നിലവിലുള്ള പൊതുമാപ്പ് കാലയളവിൽ യാത്രാനുമതി ലഭിക്കുന്ന പ്രവാസികൾ പത്ത് ദിവസത്തിനകം രാജ്യം വിടണമെന്ന് ആഭ്യന്തര മന്ത്രാലയം അറിയിച്ചു. പബ്ലിക് റിലേഷൻ ഡിപ്പാർട്ട്മെന്റുമായി സഹകരിച്ച് നടത്തിയ വെബിനാറിലാണ് ആഭ്യന്തര മന്ത്രാലയം ഇക്കാര്യം അറിയിച്ചത്. അനധികൃത താമസക്കാർക്ക് ശിക്ഷ കൂടാതെ രേഖകൾ ശരിയാക്കാൻ അനുവദിച്ച കാലാവധി 2022 മാർച്ച് 31 ന് അവസാനിക്കും. അതിന് മുൻപായി രേഖകൾ ശരിയാക്കിയ ശേഷമോ രേഖകൾ ശരിയാക്കുന്നതിന്റെ ഭാഗമായോ രാജ്യം വിടുന്ന പ്രവാസികൾക്കാണ് പത്ത് ദിവസത്തിനകം യാത്ര തിരിക്കണമെന്ന നിർദ്ദേശം.
ട്രാവൽ പെർമിറ്റ് ലഭിക്കുന്ന ദിവസം മുതലുള്ള പത്ത് ദിവസങ്ങളാണ് കണക്കാക്കുക. കഴിഞ്ഞ വർഷം ഒക്ടോബർ 10 മുതലാണ് രേഖകൾ ശരിയാക്കാൻ അധികൃതർ സമയം നൽകിയത്. മതിയായ രേഖകൾ ഇല്ലാത്തതിന് 18 വയസിൽ താഴെ ഉള്ളവർ പിടിക്കപ്പെട്ടാൽ, അവർക്ക് ഖത്തറിലേക്ക് തിരിച്ചുവരാൻ വിലക്ക് ഏർപ്പെടുത്തില്ലെന്നും, അവർക്കെതിരെ നടപടി സ്വീകരിക്കില്ലെന്നും അധികൃതർ കൂട്ടിച്ചേർത്തു.