December 11, 2021
December 11, 2021
അബുദാബി: യുഎഇയിലെ മുഴുവൻ ബാങ്കുകളും വെള്ളിയാഴ്ച ഉൾപ്പെടെ ആഴ്‍ചയില്‍ ആറ് ദിവസം പ്രവര്‍ത്തിക്കുമെന്ന് സെന്‍ട്രല്‍ ബാങ്ക് അറിയിച്ചു. കഴിഞ്ഞ ദിവസം സെൻട്രൽ ബാങ്ക് പുറപ്പെടുവിച്ച സർക്കുലർ പ്രകാരം പ്രവൃത്തി ദിനങ്ങളിൽ 5 മണിക്കൂർ എങ്കിലും ബാങ്കുകൾ തുറക്കണം എന്നും അധികൃതർ അറിയിച്ചിട്ടുണ്ട്. രാജ്യത്തെ കൊമേഴ്‍സ്യല്‍ സെന്ററുകളിലെ ബാങ്ക് ശാഖകളുടെ പ്രവൃത്തി സമയം സംബന്ധിച്ച 2003ലെ നോട്ടീസും ബാങ്കുകളുടെ പ്രവര്‍ത്തനം സംബന്ധിക്കുന്ന 1992ലെ സര്‍ക്കുലറും റദ്ദാക്കിയതായും സെന്‍ട്രല്‍ ബാങ്ക് കൂട്ടിച്ചേർത്തു.
2022 ജനുവരി രണ്ട് മുതലാണ് മാറ്റങ്ങൾ പ്രാബല്യത്തിൽ വരിക. പ്രവൃത്തി സമയം എങ്ങനെയായിരിക്കണമെന്ന് അതത് ബാങ്കുകള്‍ക്ക് തന്നെ തീരുമാനിക്കാം. ബാങ്കുകളുടെ അഡ്‍മിനിസ്‍ട്രേഷന്‍ വിഭാഗത്തിന്റെയും ബാക്ക് ഓഫീസിന്റെയും പ്രവര്‍ത്തനം നിയമാനുസൃതമായി തന്നെ ക്രമീകരിക്കണമെന്നും സര്‍ക്കുലറില്‍ നിര്‍ദേശിച്ചിട്ടുണ്ട്. അതേസമയം, പുതിയ അറിയിപ്പ് റമദാന്‍ മാസത്തില്‍ ബാധകമാവില്ല.
