January 22, 2022
January 22, 2022
അബുദാബി : വിദേശത്ത് നിന്നുള്ള സഞ്ചാരികൾക്ക് അബുദാബി എമിറേറ്റിലേക്ക് പ്രവേശിക്കാൻ ബൂസ്റ്റർ ഡോസ് നിർബന്ധമല്ലെന്ന് അധികൃതർ വ്യക്തമാക്കി. നേരത്തെ, യു.എ.ഇ യിലെ മറ്റ് എമിറേറ്റുകളിൽ നിന്നുള്ളവർ അബുദാബിയിലേക്ക് പ്രവേശിക്കുന്നത് സംബന്ധിച്ചുള്ള മാർഗനിർദ്ദേശങ്ങൾ പുറത്തിറക്കിയിരുന്നു. ഇതേ തുടർന്ന് വിദേശികളുടെ കാര്യത്തിൽ ആശയക്കുഴപ്പം ഉടലെടുത്തതോടെന്ന് അധികൃതർ കൂടുതൽ വിശദീകരണം നൽകിയത്.
യു.എ.ഇയുടെ വിവിധ ഭാഗങ്ങളിൽ നിന്നും അബുദാബിയിൽ എത്തുന്നവർ അൽ ഹുസ്ൻ ആപ്ലിക്കേഷനിൽ പതിനാല് ദിവസം മുൻപെങ്കിലും കോവിഡ് നെഗറ്റീവ് ആയ ഫലമോ, 96 മണിക്കൂർ മുൻപെങ്കിലും നടത്തിയ പരിശോധനാ ഫലമോ ആണ് ഹാജരാക്കേണ്ടത്. ഗ്രീൻ പാസ് നിലനിർത്തണമെങ്കിൽ ബൂസ്റ്റർ ഡോസ് എടുക്കുകയും വേണം. വിദേശരാജ്യങ്ങളിൽ നിന്നുമെത്തുന്ന ടൂറിസ്റ്റുകൾ, സ്വന്തം രാജ്യത്ത് വാക്സിൻ എടുത്തതിന്റെ ഔദ്യോഗിക സർട്ടിഫിക്കറ്റും, 14 ദിവസം മുൻപെങ്കിലും കോവിഡ് നെഗറ്റീവ് ആയതിന്റെ രേഖയോ, 48 മണിക്കൂർ മുൻപ് മാതൃരാജ്യത്ത് നടത്തിയ പരിശോധനയിലെ രേഖയോ കയ്യിൽ കരുതണം. 96 മണിക്കൂർ മുൻപുള്ള നെഗറ്റീവ് പീസീആർ ഫലം കൈവശമുണ്ടെങ്കിൽ വാക്സിനെടുക്കാത്ത സന്ദർശകർക്കും അബുദാബിയിൽ പ്രവേശിക്കാം. ദുബൈ- അബുദാബി കര അതിർത്തിയിലെ വലത് പാതയായ ലൈൻ 1 ടൂറിസ്റ്റുകൾക്കായി സജ്ജീകരിച്ചിട്ടുണ്ട്.