January 04, 2022
January 04, 2022
ദോഹ : മുതിർന്ന പൗരന്മാർക്ക് ബൂസ്റ്റർ ഡോസ് സ്വീകരിക്കാൻ മൂന്ന് മാർഗങ്ങൾ നിർദേശിച്ച് ഖത്തർ ആരോഗ്യമന്ത്രാലയം. റുമൈലിയ ആശുപത്രി മെഡിക്കൽ ഡയറക്ടറായ ഡോക്ടർ ഹനാദി അൽ ഹമദാണ് ഖത്തർ ടീവിയിലെ പ്രോഗ്രാമിനിടെ ഈ മാർഗങ്ങൾ വിശദീകരിച്ചത്.
ഹമദ് മെഡിക്കൽ കോർപറേഷനിലെ ഹോം കെയർ സർവീസിൽ രജിസ്റ്റർ ചെയ്തിട്ടുള്ള മുതിർന്ന പൗരന്മാർക്ക് 44390111 എന്ന ഹോട്ട് ലൈൻ നമ്പറിൽ വിളിച്ചാൽ വീട്ടിലെത്തി ബൂസ്റ്റർ ഡോസ് കുത്തിവെപ്പ് നൽകും.ഈ സർവീസിൽ പേര് രജിസ്റ്റർ ചെയ്തിട്ടില്ലാത്ത വയോധികർക്ക് 40277077 എന്ന നമ്പറിൽ ബന്ധപ്പെട്ടാൽ അടുത്തുള്ള ഹെൽത്ത് സെന്ററിൽ ചെന്ന് ബൂസ്റ്റർ ഡോസ് സ്വീകരിക്കാം. പ്രായമാവർക്കായി ഹെൽത്ത് സെന്ററുകളിൽ പ്രത്യേക ക്യൂ തയ്യാറാക്കിയിട്ടുണ്ട്. റുമൈലിയ ഹോസ്പിറ്റലിൽ സജ്ജീകരിച്ചിട്ടുള്ള പ്രത്യേക സെന്ററാണ് ബൂസ്റ്റർ ഡോസ് സ്വീകരിക്കാനുള്ള മൂന്നാമത്തെ മാർഗം. പ്രായമായവർക്ക് ഇവിടെ രജിസ്റ്റർ ചെയ്യാതെ തന്നെ ബൂസ്റ്റർ ഡോസ് ലഭിക്കും. രാവിലെ ഏഴ് മണി മുതൽ രാത്രി പത്തുമണിവരെയാണ് ഈ സെന്റർ പ്രവർത്തിക്കുക. താല്പര്യമുള്ളവർക്ക് 33253128 എന്ന നമ്പറിൽ വിളിച്ച് മുൻകൂട്ടി പേര് രജിസ്റ്റർ ചെയ്തും വാക്സിൻ എടുക്കാം. കോവിഡ് കേസുകൾ വർധിക്കുന്ന സാഹചര്യത്തിൽ എല്ലാവരും എത്രയും പെട്ടെന്ന് ബൂസ്റ്റർ ഡോസ് സ്വീകരിക്കണമെന്നും ഡോക്ടർ അഭ്യർത്ഥിച്ചു.