March 13, 2020
March 13, 2020
കുവൈത്ത് സിറ്റി : കുവൈത്തിൽ കഴിഞ്ഞ 24 മണിക്കൂറിനുള്ളിൽ 20 പേരിൽ കൂടി കോവിഡ് 19 രോഗബാധ സ്ഥിരീകരിച്ചതായി ആരോഗ്യമന്ത്രാലയം പ്രസ്താവനയിൽ അറിയിച്ചു. ഇതോടെ രാജ്യത്തെ മൊത്തം രോഗബാധിതരുടെ എണ്ണം 100 ആയി. ഇന്ന് പുതുതായി രോഗബാധ സ്ഥിരീകരിച്ചവരിൽ 15 പേരും ഇറാനിൽ നിന്ന് കുവൈത്തിൽ തിരിച്ചെത്തിയവരാണ്. ഇവർ കരുതൽ വാസത്തിൽ നിരീക്ഷണത്തിലായിരുന്നു.ബാക്കിയുള്ള നാല് പേർ ബ്രിട്ടനിൽ നിന്നും ഒരാൾ അമേരിക്കയിൽ നിന്നും രാജ്യത്ത് തിരിച്ചെത്തിയവരാണ്.ഇവരിൽ ഒരാളുടെ നില ഗുരുതരമാണ്.
കുവൈത്തിൽ ഇതുവരെ 7,525 പേരിൽ രോഗപരിശോധന നടത്തിയതായും ആരോഗ്യമന്ത്രാലയം വ്യക്തമാക്കി. വൈറസ് വ്യാപനം തടയാൻ ലക്ഷ്യമാക്കി കുവൈത്ത് ശക്തമായ മുൻകരുതൽ നടപടികളാണ് സ്വീകരിക്കുന്നത്. ഫെബ്രുവരി 27 ന് ശേഷം രാജ്യത്ത് തിരിച്ചെത്തിയവർ വീട്ടിൽ തന്നെ കഴിയണമെന്നും പുറത്തിറങ്ങുന്നവരെ പിടികൂടി നാടുകടത്തുമെന്നും അധികൃതർ മുന്നറിയിപ്പ് നൽകിയിട്ടുണ്ട്.രാജ്യത്തെ എല്ലാ വിമാനസർവീസുകളും നിർത്തിവെച്ചിട്ടുണ്ട്.
ന്യൂസ്റൂം വാർത്തകൾ മുടങ്ങാതെ ലഭിക്കാത്തവർ +974 66200 167 എന്ന നമ്പറിലേക്ക് സന്ദേശം അയക്കുക.