June 07, 2020
June 07, 2020
ദോഹ : ഖത്തറിൽ വന്ദേഭാരത് പദ്ധതി പ്രകാരം നാട്ടിലേക്ക് മടങ്ങുന്ന യാത്രക്കാരുടെ മുന്ഗണനാപട്ടിക തയാറാക്കാന് ഇന്ത്യന് എംബസി രൂപീകരിച്ച കേരളത്തിനായുള്ള പ്രത്യേക കമ്മിറ്റിയുടെ പ്രവർത്തനങ്ങൾ മരവിപ്പിച്ചു.തല്ക്കാലം പ്രവര്ത്തനം നിര്ത്തിവെക്കാന് എംബസിയില് നിന്ന് കമ്മിറ്റി അംഗങ്ങള്ക്ക് അറിയിപ്പ് ലഭിച്ചു.കേരളത്തിലേക്കുള്ള വിവിധ വിമാനങ്ങളിലെ യാത്രക്കാരുമായി ബന്ധപ്പെട്ട വിവരങ്ങള് ഇതിനകം തയാറായതിനാലാണ് പ്രവര്ത്തനം തല്ക്കാലം നിര്ത്തിവെക്കുന്നതെന്നാണ് കമ്മിറ്റി അംഗങ്ങൾ വിശദീകരിക്കുന്നത്.എന്നാൽ കമ്മറ്റിയിലെ പല അംഗങ്ങളും ഇതുമായി ബന്ധപ്പെട്ട് പ്രതികരിക്കാൻ തയാറായില്ല.ഗുരുതരമായ അസുഖങ്ങൾ നേരിടുന്ന,പെട്ടെന്ന് നാട്ടിലേക്ക് മടങ്ങേണ്ടവരുടെ വിവരങ്ങൾ ശേഖരിക്കാനുള്ള കമ്മറ്റിയിൽ ഒരു ഡോക്ടറെ പോലും ഉൾപ്പെടുത്താതെ വിവിധ രാഷ്ട്രീയ പാർട്ടികളുടെ പോഷക സംഘടനകളിൽ നിന്നുള്ള അംഗങ്ങളെ മാത്രമാണ് ഉൾപ്പെടുത്തിയിരുന്നത്.ഇത് ക്രമക്കേടുകൾക്ക് വഴിവെക്കുമെന്ന് നേരത്തെ ന്യൂസ്റൂം ചൂണ്ടിക്കാട്ടിയിരുന്നു.
അതേസമയം,അനർഹരായ നിരവധി പേർ കയറിപ്പോയിട്ടും ഗുരുതരമായ ആരോഗ്യ പ്രശ്നങ്ങൾ നേരിടുന്ന നിരവധി പേർ ഇപ്പോഴും എംബസിയിൽ നിന്ന് യാതൊരു അറിയിപ്പും ലഭിക്കാതെ അവസരം കാത്തു കഴിയുകയാണ്.ഈ സാഹചര്യത്തിലാവാം കമ്മറ്റി പിരിച്ചു വിട്ട് യാത്രക്കാരുട മുൻഗണനാ ക്രമം തീരുമാനിക്കാനുള്ള നടപടികൾ എംബസിയുടെ നേരിട്ടുള്ള മേൽനോട്ടത്തിലാക്കിയതെന്നാണ് ലഭ്യമായ വിവരം.
ന്യൂസ്റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന ഖത്തർ വാട്സാപ്പ് നമ്പറിലേക്ക് നിങ്ങളുടെ പേര് സന്ദേശമായി അയക്കുക