August 01, 2023
August 01, 2023
ന്യൂസ്റൂം ബ്യൂറോ
റിയാദ്: എട്ട് വർഷമായി നാട്ടിൽ പോയിട്ടില്ലാത്ത മലയാളിയെ സൗദി അറേബ്യയിൽ കാണാനില്ലെന്ന് പരാതി. മലപ്പുറം വേങ്ങരയിലെ കുറ്റൂർ സ്വദേശി അബ്ദുൽ സലാം കമ്പ്രയെ (53) കുറിച്ചാണ് 10 മാസമായി യാതൊരു വിവരവുമില്ലെന്ന് നാട്ടിലുള്ള കുടുംബം പരാതിപ്പെടുന്നത്. 16 വർഷം മുമ്പാണ് അദ്ദേഹം ആദ്യമായി സൗദിയിയിൽ എത്തിയത്. ജിദ്ദയിലാണ് ജോലി ചെയ്തിരുന്നത്. ഇതിനിടയിൽ പലതവണ അവധിക്ക് നാട്ടിൽ പോയി വന്നിട്ടുമുണ്ട്.
എന്നാൽ, അവസാനമായി എട്ട് വർഷം മുൻപാണ് അബ്ദുൽ സലാം നാട്ടിലേക്ക് പോയത് . ഒരു വർഷം മുൻപ് പിതാവ് സൈതലവി കമ്പ്ര മരിച്ചപ്പോഴും അദ്ദേഹം നാട്ടിലേക്ക് പോയിരുന്നില്ല. നിയമപ്രശ്നങ്ങൾ കാരണം നാട്ടിൽ വരാൻ കഴിയാത്തതായിരിക്കും എന്നായിരുന്നു കുടുംബം കരുതിയിരുന്നത്.
അവസാനമായി 10 മാസം മുൻപാണ് അബ്ദുൽ സലാം നാട്ടിലേക്ക് ഫോൺ വിളിച്ച് സംസാരിച്ചത്. താൻ ഉടൻ നാട്ടിൽ വരുമെന്നും അതിനായി പൊലീസിൽ പിടി കൊടുത്ത് ജയിലിൽ കഴിയാൻ പോവുകയാണെന്നുമായിരുന്നു അവസാനത്തെ ഫോൺ സംഭാഷണത്തിൽ മകൻ സൽമാനിനോട് അദ്ദേഹം പറഞ്ഞത്. അതിന് ശേഷം വിളിച്ചിട്ടില്ല. ആ നമ്പറിലേക്ക് കുടുംബം തിരിച്ചു വിളിക്കാൻ പലവട്ടം ശ്രമിച്ചിരുന്നുവെങ്കിലും കോൾ കിട്ടിയിട്ടില്ല.
ആ ഫോൺനമ്പർ ഇപ്പോൾ പ്രവർത്തനരഹിതമാണ്. കുടുംബം പലരീതിയിൽ അന്വേഷിക്കുന്നുണ്ടെങ്കിലും ഒരു വിവരവും ഇതുവരെ കിട്ടിയില്ല. സൗദിയിലുള്ള ബന്ധുക്കളും അയൽക്കാരും നാട്ടുകാരും വഴി അന്വേഷണം ഇപ്പോഴും തുടരുകയാണ്.
ഇദ്ദേഹത്തെക്കുറിച്ച് വിവരം കിട്ടുന്നവർ രാധാകൃഷ്ണൻ (0572760702), ഷാഫി (0557423404), കലാം (0539270102), കബീർ പള്ളിയാളി (0091 9744050553) എന്നിവരെ ബന്ധപ്പെട്ട് അറിയിക്കണമെന്ന് കുടുംബം അഭ്യർഥിക്കുന്നു.
ന്യൂസ്റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/IkqmkUPd0fhGs9abNGXONmh