September 18, 2023
September 18, 2023
ന്യൂ ഡൽഹി: ഗള്‍ഫിലേക്കുള്ള വിമാന യാത്രാ നിരക്ക് കുറയ്ക്കണമെന്ന് ആവശ്യപ്പെട്ട് സുപ്രീംകോടതിയില്‍ ഹര്‍ജി സമർപ്പിച്ച് കേരള പ്രവാസി അസോസിയേഷൻ. വിമാന യാത്രാ നിരക്കിന് പരിധി നിശ്ചയിക്കണമെന്നാണ് ഹര്‍ജിയിലെ ആവശ്യം. ഇന്ത്യൻ നിയമത്തിലെ 135 പ്രകാരം ടിക്കറ്റ് നിരക്ക് തീരുമാനിക്കാൻ വിമാന കമ്പനികൾക്ക് അധികാരമുണ്ട്. ഈ നിയമം നിലനിൽക്കുന്ന സാഹചര്യത്തിലാണ് ഹർജി സമർപ്പിച്ചത്.
അതേസമയം, ഈ നിയമങ്ങൾ ഭരണഘടന വിരുദ്ധമാണെന്നും യാത്ര ചെയ്യാനുള്ള പൗരന്റെ അവകാശത്തിന്റെ ലംഘനമാണെന്നും ഹർജിയിൽ വാദിക്കുന്നുണ്ട്. വിമാന യാത്രാ നിരക്ക് സംമ്പന്ധിച്ച് സര്‍ക്കാര്‍ തീരുമാനങ്ങളൊന്നും എടുക്കാത്ത സാഹചര്യത്തിലാണ് കോടതിയെ സമീപിക്കാന്‍ തീരുമാനിച്ചതെന്ന് കേരളാ പ്രവാസി അസോസിയേഷന് വ്യക്തമാക്കി.
വിമാന കമ്പനികളുടെ ടിക്കറ്റ് നിരക്കിനെതിരെ കേരള പ്രവാസി അസോസിയേഷന് ദില്ലി ഹൈക്കോടതിയിലും ഹര്‍ജി സമര്‍പ്പിച്ചിരുന്നു. എന്നാൽ ഹൈകോടതി ഇതിൽ ഇടപെട്ടിരുന്നില്ല. അസോസിയേഷന് വേണ്ടി ചെയര്‍മാന്‍ രാജേന്ദ്രന്‍ വെള്ളപാലത്തും, പ്രസിഡന്റ് അശ്വനി നമ്പാറമ്പത്തുമാണ് ഹര്‍ജിക്കാർ. അഭിഭാഷകരായ ശ്യംമോഹൻ,കുര്യാക്കോസ് വർഗീസ് എന്നിവരാണ് ഹർജി ഫയൽ ചെയ്തത്.
ഗൾഫ് രാജ്യങ്ങളില്‍ അവധിക്കാലമായ ജൂൺ മുതല്‍ സെപ്റ്റംബർ വരെയുള്ള മാസങ്ങളിലാണ് നിരക്ക് ഏറ്റവും കൂടുതൽ ഉയരാറുള്ളത്. വിമാന ഇന്ധനവില ഉയർന്നതാണ് നിരക്ക് ഉയരാന്‍ കാരണമായി വിമാനകമ്പനികൾ പറയുന്നത്.
ന്യൂസ്‌റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/G3GYQhfaTLoDVK1Qr9fc5G
