August 30, 2023
August 30, 2023
ജിസാൻ: സൗദിയിലെ ജിസാൻ മേഖലയിൽ കനത്ത മഴ. ശക്തമായ കാറ്റിലും മഴയിലും നിരവധി നാശനഷ്ടങ്ങളും റിപ്പോർട്ട് ചെയ്തിട്ടുണ്ട്. കനത്ത മഴയിൽ യൂണിവേഴ്സിറ്റിയിലെ ക്ലാസ് മുറിയുടെ മേൽക്കൂര പൊട്ടി താഴെ വീഴുന്നതിന്റെ വീഡിയോ ദൃശ്യങ്ങൾ പലരും സമൂഹ മാധ്യമങ്ങളിൽ പങ്കു വച്ചു. വിദ്യാർഥിനികൾ ക്ലാസ് മുറിയുടെ ഒരു മൂലയിലേക്ക് മാറി നിൽക്കുന്നതിനിടെയാണ് മേൽക്കൂര പൊളിഞ്ഞുവീണത്. വീഡിയോയിൽ കുട്ടികളുടെ ശബ്ദവും കേൾക്കാനാവും.
സൗദിയുടെ വിവിധ ഭാഗങ്ങളിൽ അടുത്ത ഞായറാഴ്ച വരെ ശക്തമായ മഴക്കും ഇടിമിന്നലിനും സാധ്യതയുള്ളതായി കാലാവസ്ഥ നിരീക്ഷണ വിഭാഗം അറിയിച്ചു. തോടുകൾ, വെള്ളം അടിഞ്ഞുകൂടുന്ന സ്ഥലങ്ങൾ, താഴ്വരകൾ തുടങ്ങിയ സ്ഥലങ്ങളിൽ നിന്ന് മാറിനിൽക്കണമെന്നും, തോടുകളും ചതുപ്പുകളും രൂപപ്പെടാനുള്ള സാധ്യത ഉള്ളതിനാൽ ജാഗ്രത പാലിക്കണമെന്നും സിവിൽ ഡിഫൻസ് മുന്നറിയിപ്പ് നൽകി. വിവിധ മാധ്യമങ്ങളിലൂടെ പ്രഖ്യാപിച്ച നിർദ്ദേശങ്ങൾ പാലിക്കണമെന്നും അധികൃതർ നിർദേശിച്ചു.
അതേസമയം, റിയാദിൽ ശക്തമായ പൊടിക്കാറ്റിനും നേരിയ മഴക്കും കൊടുങ്കാറ്റിനും സാധ്യതയുണ്ട്. അഫീഫ്, ദവാദ്മി, അൽഖുവയ്യ, അൽറെയിൻ, അൽസുൽഫി, അൽമജ്മ, ശഖ്റ, താദിഖ്, ഹുറൈമില, റിമ, വാദി അൽദവാസിർ, അൽസുലൈയിൽ, ഖുൻഫുദ, അൽലൈത്ത്, അൽഖുർമ, റാനിയ, തുർബ, അൽകാമിൽ, അസീർ, ജസാൻ, അൽബഹ തുടങ്ങിയ മേഖലകളിൽ മുന്നറിയിപ്പ് നൽകിയിട്ടുണ്ട്. മദീന മേഖലയിലും ശക്തമായ മഴക്കും കാറ്റിനും സാധ്യതയുണ്ട്.
ന്യൂസ്റൂം വാർത്തകളും തൊഴിൽ സംബന്ധമായ അറിയിപ്പുകളും മുടങ്ങാതെ ലഭിക്കാൻ ഇതുവരെ ന്യൂസ്റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക- https://chat.whatsapp.com/7iFkiXrjqZbE8gsI6yASj9