December 05, 2019
December 05, 2019
ദോഹ : അമേരിക്കയുടെ അഫ്ഗാൻ സമാധാന ദൂതൻ സൽമായ് ഖലീൽസാദ് ഉടൻ ഖത്തർ സന്ദർശിക്കുമെന്ന് റോയിട്ടേഴ്‌സ് റിപ്പോർട്ട് ചെയ്തു. കാബൂൾ സന്ദർശനം പൂർത്തിയാക്കിയാണ് അഫ്ഗാൻ സമാധാന ചർച്ചകൾക്കായി അദ്ദേഹം ദോഹയിൽ എത്തുന്നത്. ഖത്തറിന്റെ മധ്യസ്ഥതയിൽ കഴിഞ്ഞ കുറെ ദിവസങ്ങളായി തുടരുന്ന അഫ്ഗാൻ-താലിബാൻ സമാധാന ചർച്ചകൾക്കായാണ് അമേരിക്കയുടെ അഫ്ഗാൻ പ്രത്യേക പ്രതിനിധി വീണ്ടും ദോഹയിൽ എത്തുന്നത്.
അഫ്‌ഗാനിൽ സമാധാനം പുനഃസ്ഥാപിക്കാൻ ലക്ഷ്യമിട്ട് ഈ വർഷം തുടക്കത്തിൽ ആരംഭിച്ച സമാധാന ചർച്ചകൾ പിന്നീട് നിർത്തിവെക്കുകയായിരുന്നു. താലിബാൻ ആക്രമണത്തിൽ ഒരു അമേരിക്കൻ സൈനികൻ കൊല്ലപ്പെട്ടതിനെ തുടർന്നാണ് കഴിഞ്ഞ സെപ്തംബറിൽ സമാധാന ചർച്ചകൾ നിർത്തിവെച്ചതായി ട്രംപ് അറിയിച്ചത്. എന്നാൽ കഴിഞ്ഞ വ്യാഴാഴ്ച അഫ്‌ഗാനിസ്ഥാനിലെ അമേരിക്കൻ സൈനിക ക്യാംപിൽ നടത്തിയ മിന്നൽ സന്ദർശനത്തിനിടെ രണ്ടു മാസത്തെ ഇടവേളക്ക് ശേഷം താലിബാനുമായുള്ള സമാധാന ചർച്ചകൾ പുനരാരംഭിച്ചതായി പ്രസിഡന്റ് ട്രംപ് വെളിപ്പെടുത്തിയിരുന്നു. താലിബാൻ വക്താവ് സബീനുള്ള മുജാഹിദും പിന്നീട് ഇക്കാര്യം സ്ഥിരീകരിച്ചിരുന്നു.
