August 19, 2020
August 19, 2020
ദോഹ : കേരളത്തില് നിന്നുള്ള യാത്രക്കാരുമായി ഇൻഡിഗോ വിമാനങ്ങൾ ദോഹയിൽ എത്തിതുടങ്ങി.കണ്ണൂരിൽ നിന്നുള്ള 6E8434 ഇൻഡിഗോ വിമാനം ഇന്ന് (ബുധനാഴ്ച) രാവിലെ 10.30 ന് ദോഹയിൽ ഇറങ്ങി.എയർ ബബിൾ കരാർ നിലവിൽ വന്ന ശേഷം കേരളത്തിൽ നിന്നും ദോഹയിലെത്തുന്ന രണ്ടാമത്തെ വിമാനമാണിത്.
മാസങ്ങൾ നീണ്ട യാത്രാ വിലക്കിന് ശേഷം കൊച്ചി അന്താരാഷ്ട്ര വിമാനത്താവളത്തില് നിന്നുള്ള ആദ്യ ഇന്ഡിഗോ എയര്ലൈന്സ് വിമാനം ഇന്നലെയാണ് 103 യാത്രക്കാരുമായി ദോഹയിൽ ഇറങ്ങിയത്. കെഎംസിസി പാസഞ്ചേഴ്സ് പോര്ട്ടലില് ചാർട്ടേഡ് വിമാനങ്ങൾക്കായി നേരത്തെ രജിസ്റ്റര് ചെയ്ത ഏതാനും യാത്രക്കാരും ഈ വിമാനത്തിലുണ്ടായിരുന്നു. ഈ മാസം ആദ്യം ഖത്തറിലേക്ക് വിമാനം ചാര്ട്ടര് ചെയ്യാന് കെഎംസിസി കോഴിക്കോട് ജില്ലാ കമ്മിറ്റി ശ്രമം നടത്തിയിരുന്നെങ്കിലും സാധ്യമായിരുന്നില്ല. തുടര്ന്ന് ചാര്ട്ടേര്ഡ് വിമാനത്തിലേക്ക് രജിസ്റ്റര് ചെയ്ത ഏതാനും പേരെ ആരോഗ്യപ്രവർത്തകർക്കുള്ള വന്ദേഭാരത് വിമാനത്തില് ഖത്തറിലെത്തിച്ചിരുന്നു. അവശേഷിക്കുന്ന യാത്രക്കാരിൽ ചിലർക്കാണ് വന്ദേ ഭാരത് മിഷന്റെ ഈ വിമാനത്തിൽ സംഘടന തന്നെ യാത്രാ സൗകര്യം ഒരുക്കിയത്.
അതേസമയം,കേരളത്തിൽ നിന്നും ഇന്നലെ വരേണ്ടിയിരുന്ന ഖത്തർ എയർവേയ്സ് വിമാനം ഇന്നും യാത്ര റദ്ദാക്കി.കോഴിക്കോട് നിന്നും ഇന്നലെ വരേണ്ടിയിരുന്ന വിമാനം റദ്ദാക്കിയതിനെ തുടർന്ന് ഈ വിമാനത്തിൽ ടിക്കറ്റെടുത്തവർക്ക് ഇന്നത്തേക്ക് ടിക്കറ്റ് മാറ്റി നൽകിയിരുന്നു. എന്നാൽ ബുധനാഴ്ചയും യാത്ര റദ്ദാക്കിയതായി ഇന്നലെ രാത്രിയോടെ യാത്രക്കാരെ വിവരം അറിയിക്കുകയായിരുന്നു.
ന്യൂസ്റൂം വാർത്തകൾ ടെലഗ്രാമിൽ ലഭിക്കാൻ ഈ ലിങ്കിൽ ചേരുക. വാർത്തകൾ വാട്സ്ആപ്പിൽ ലഭിക്കാൻ +974 66200167 എന്ന നമ്പറിൽ ബന്ധപ്പെടുക.