March 22, 2022
March 22, 2022
റിയാദ് : സൗദി അറേബ്യക്ക് നേരെ നിരന്തരം നടത്തുന്ന ആക്രമണങ്ങളിൽ നിന്നും ഹൂതികൾ പിന്മാറിയില്ലെങ്കിൽ, ദൂരവ്യാപകമായ പ്രത്യാഘാതങ്ങളുണ്ടാവുമെന്ന് സൗദിയുടെ മുന്നറിയിപ്പ്. ഇന്ധന ക്ഷാമം അടക്കമുള്ള പ്രശ്നങ്ങൾ ഉടലെടുക്കാൻ സാധ്യത ഉണ്ടെന്നാണ് സൗദി ലോകരാജ്യങ്ങളെ അറിയിച്ചത്. ഹൂതികളുടെ ആക്രമണത്തിൽ ആഗോള സമൂഹം വേണ്ടത്ര ജാഗ്രത കാണിക്കുന്നില്ലെന്നും സൗദി പരാതിപ്പെട്ടു.
കഴിഞ്ഞ ദിവസങ്ങളിലായി ഹൂതികൾ നടത്തിയ ആക്രമണങ്ങളിൽ ഭൂരിഭാഗവും എണ്ണ സംഭരണ കേന്ദ്രങ്ങൾക്ക് നേരെയായിരുന്നു. അരാംകോയുടെ എണ്ണ സംഭരണ ശാലയ്ക്ക് നേരെയും മിസൈലാക്രമണമുണ്ടായി. നൂതന പ്രതിരോധ സംവിധാനങ്ങൾ ഉപയോഗിച്ച്, ഈ ആക്രമണങ്ങളെ നിർവീര്യമാക്കാൻ സൗദി സഖ്യസേനയ്ക്ക് കഴിഞ്ഞെങ്കിലും, റോക്കറ്റുകളുടെയും ഡ്രോണുകളുടെയും അവശിഷ്ടങ്ങൾ വീണ് നാശനഷ്ടങ്ങൾ ഉണ്ടായതായി റിപ്പോർട്ട് ചെയ്യപ്പെട്ടിരുന്നു. ഇതുകാരണം യാമ്പു റിഫൈനറിയിലെ ഇന്ധന ഉല്പാദനത്തിന്റെ തോത് കുറക്കേണ്ടി വന്നതായും സൗദി അറിയിച്ചു.