January 24, 2022
January 24, 2022
റിയാദ് : പ്രീമിയം ഇഖാമ കൈവശമുള്ളവർക്ക് ഭൂമി വാങ്ങാനുള്ള അനുമതി അടക്കമുള്ള ആനുകൂല്യങ്ങൾ നിലവിൽ വന്നു. ഇതോടെ സൗദിയിലെ സ്വദേശി പൗരന്മാർക്ക് ലഭിക്കുന്ന മിക്ക ആനുകൂല്യങ്ങളും പ്രീമിയം റസിഡൻസിയുള്ള വിദേശിക്കും ലഭിക്കും. പ്രീമിയം ഇഖാമയ്ക്കുള്ള അപേക്ഷ സ്വീകരിക്കാനും, ബന്ധപ്പെട്ട നടപടികൾ വേഗത്തിൽ പൂർത്തിയാക്കാനുമായി പ്രത്യേക ഓഫീസുകൾ ആരംഭിച്ചതായും അധികൃതർ അറിയിച്ചു.
പ്രീമിയം ഇഖാമ ഉള്ളവർക്ക് മക്കയിലും മദീനയിലും ഒഴികെ സൗദിയിൽ എവിടെയും ഭൂമിയോ കെട്ടിടങ്ങളോ വാങ്ങാം. ഇതോടൊപ്പം, സ്വകാര്യമേഖലയിലെ സ്വദേശിവത്കരിക്കപ്പെട്ട തസ്തികകളിൽ ഉൾപ്പെടെ ജോലി ചെയ്യാനും കഴിയും. കുടുംബത്തോടൊപ്പം രാജ്യത്ത് താമസിക്കുക, ബിസിനസ് സംരംഭങ്ങൾ തുടങ്ങുക തുടങ്ങിയ നിരവധി കാര്യങ്ങൾക്കുള്ള അനുമതിയും പ്രീമിയം ഇഖാമയിലൂടെ ലഭിക്കും. രാജ്യത്തേക്ക് വിദേശ നിക്ഷേപകരെ ആകർഷിക്കാൻ വേണ്ടിയാണ് പ്രീമിയം ഇഖാമ പദ്ധതി ആവിഷ്കരിച്ചത്. ചെറിയ കാലയളവിലേക്കും, ദീർഘമായ കാലാവധിയിലേക്കും പ്രീമിയം ഇഖാമ നേടാൻ അവസരമുണ്ട്.
