September 19, 2019
September 19, 2019
തെഹ്റാൻ : സൗദി അറേബ്യയിലെ അരാംകോ എണ്ണസംസ്കരണ ശാലകൾക്ക് നേരെയുണ്ടായ ആക്രമണങ്ങളില് തങ്ങള്ക്ക് പങ്കില്ലെന്ന് വ്യക്തമാക്കി ഇറാന് അമേരിക്കയ്ക്ക് നയതന്ത്ര കുറിപ്പയച്ചു. സൗദിയിലെ ഹൂതി ആക്രമണത്തിന്റെ പേരില് ഇറാനെതിരെ എന്തെങ്കിലും നടപടിയുണ്ടായാല് ഉടന് പ്രതികരണമുണ്ടാകുമെന്നും അത് വെറും ഭീഷണിയില് ഒതുങ്ങില്ലെന്നും കുറിപ്പില് മുന്നറിയിപ്പ് നല്കി.
ഇറാനില് അമേരിക്കയുടെ നയതന്ത്രകാര്യങ്ങള് നോക്കുന്ന സ്വീഡിഷ് എംബസി വഴി തിങ്കളാഴ്ചയാണ് കുറിപ്പ് നല്കിയതെന്ന് ഇറാന് ഔദ്യോഗിക വാര്ത്താ ഏജന്സി ഇര്ന അറിയിച്ചു. ഇക്കാര്യത്തില് അമേരിക്കന് പ്രസിഡന്റ് ഡോണള്ഡ് ട്രംപിന്റെ വാദം ഇറാന് നിഷേധിച്ചു. അതേസമയം, സൗദിയില് യമനിലെ ഹൂതികള് നടത്തിയ ആക്രമണം മുന്നറിയിപ്പാണെന്ന് ഇറാന് പ്രസിഡന്റ് ഹസ്സന് റൂഹാനി പറഞ്ഞു. അമേരിക്കന് പിന്തുണയോടെ സൗദി സഖ്യം യമനില് നടത്തുന്ന യുദ്ധത്തിന് പ്രതികരണമായി കൂടുതല് വ്യാപകമായ യുദ്ധമുണ്ടാകാമെന്ന മുന്നറിയിപ്പാണ് തുടർച്ചയായ ആക്രമണങ്ങൾ. ഈ മുന്നറിയിപ്പില് നിന്ന് പാഠങ്ങള് പഠിക്കാനും മേഖലയില് യുദ്ധമുണ്ടാകാനുള്ള സാഹചര്യമാണ് നിലനിൽക്കുന്നതെന്നും റൂഹാനി ആവശ്യപ്പെട്ടു.