December 26, 2019
December 26, 2019
ദോഹ : ഖത്തർ ആഭ്യന്തര മന്ത്രാലയം ഉടൻ നടപ്പാക്കാനിരിക്കുന്ന ദേശീയ മേൽവിലാസ നിയമത്തിന് രാജ്യത്തെ പൗരന്മാരിൽ നിന്നും താമസക്കാരിൽ നിന്നും വൻ പിന്തുണ ലഭിക്കുന്നതായി റിപ്പോർട്ട്. മന്ത്രാലയം ഇത് സംബന്ധിച്ച് നടത്തിയ ഓൺലൈൻ സർവേയിൽ 91 ശതമാനം പേരും മേൽവിലാസ നിയമത്തിന്റെ പ്രാധാന്യം ചൂണ്ടിക്കാട്ടിയതായി പ്രാദേശിക പത്രം റിപ്പോർട്ട് ചെയ്തു. മേൽവിലാസ നിയമത്തിന്റെ പ്രാധാന്യത്തെ കുറിച്ച് വ്യക്തികളുടെയും സ്ഥാപനങ്ങളുടെയും അഭിപ്രായം ആരായാനാണ് മന്ത്രാലയം സർവേ നടത്തിയത്.
1854 പേരാണ് സർവേയിൽ പങ്കെടുത്ത് തങ്ങളുടെ അഭിപ്രായങ്ങൾ അറിയിച്ചത്. ഇതിൽ 1399 പേരും ദേശീയ മേൽവിലാസ നിയമം 'വളരെ പ്രധാന'മാണെന്ന് ചൂണ്ടിക്കാട്ടിയപ്പോൾ 299 പേർ നിയമം 'പ്രധാന'പ്പെട്ടതാണെന്ന് മാത്രം അഭിപ്രായപ്പെട്ടു. അതേസമയം, 80 പേർ മാത്രമാണ് നിയമം അത്ര പ്രധാനമല്ലെന്ന് അഭിപ്രായപ്പെട്ടത്. കഴിഞ്ഞ നവംബർ 18 നാണ് രാജ്യത്ത് ദേശീയ മേൽവിലാസ നിയമം നടപ്പിലാക്കുന്ന കാര്യം ആഭ്യന്തര മന്ത്രാലയം ഔദ്യോഗികമായി പ്രഖ്യാപിച്ചത്. രാജ്യത്തെ പൗരന്മാരുടെയും താമസക്കാരുടെയും താമസസ്ഥലത്തെ മേൽവിലാസം ഉൾപ്പെടെയുള്ള മുഴുവൻ വിവരങ്ങളും ഡിജിറ്റൽ ഡാറ്റയായി സൂക്ഷിക്കുന്നതാണ് ദേശീയ മേൽവിലാസ നിയമം.പദ്ധതി ഉടൻ നിലവിൽ വരും.
