October 13, 2019
October 13, 2019
റബാത്ത്: പശ്ചിമേഷ്യയിലെ സുരക്ഷാ സംവിധാനങ്ങൾ വിപുലീകരിക്കണമെന്ന് ഖത്തർ വിദേശകാര്യ മന്ത്രിയും ഉപ പ്രധാനമന്ത്രിയുമായ ശൈഖ് മുഹമ്മദ് ബിൻ അബ്ദുറഹ്മാൻ അൽഥാനി ആവശ്യപ്പെട്ടു. മേഖലയിൽ സുരക്ഷയും അഭിവൃദ്ധിയും കൈവരിക്കുന്നതിന് അടിസ്ഥാന സുരക്ഷാ തത്വങ്ങളിൽ ഊന്നിയുള്ള സുരക്ഷാ കരാർ വ്യവസ്ഥാപിതമായി നടപ്പിലാക്കണമെന്നും അദ്ദേഹം ആവശ്യപ്പെട്ടു. ഭൂരാഷ്ട്രപരമായ സംഘർഷങ്ങൾക്കിടയിലും ഇത്തരമൊരു കരാറിനുള്ള സാധ്യതയിൽ ഖത്തറിന് വിശ്വാസമുണ്ടെന്നും അദ്ദേഹം കൂട്ടിച്ചേർത്തു.
മൊറോക്കോയിലെ വേൾഡ് പോളിസി സമ്മേളനത്തിൽ സംസാരിക്കുകയായിരുന്നു ശൈഖ് മുഹമ്മദ് ബിൻ അബ്ദുറഹ്മാൻ അൽഥാനി. പശ്ചിമേഷ്യയിൽ പ്രാദേശിക സുരക്ഷാ കരാർ അന്തിമമാക്കണമെന്ന ഖത്തർ ഭരണാധികാരി ശൈഖ് തമീം ബിൻ ഹമദ് അൽഥാനിയുടെ ആഹ്വാനം അദ്ദേഹം പ്രത്യേകം പരാമർശിക്കുകയും ചെയ്തു. മേഖലയിൽ ദീർഘകാലത്തേക്കുള്ള സുരക്ഷയും സ്ഥിരതയും ഉറപ്പാക്കുന്ന ഒരു സുസ്ഥിര ചട്ടക്കൂട് മേഖല അത്യാവശ്യമായി ആവശ്യപ്പെടുന്നുണ്ട്.
പശ്ചിമേഷ്യക്ക് പൊതുവിലും അറബ് മേഖലയിൽ വിശേഷിച്ചും സുരക്ഷയും സുസ്ഥിരതയും നിലനിർത്താൻ പ്രാദേശികമായ സുരക്ഷാ സംവിധാനം വേണമെന്ന് യു.എൻ പൊതുസഭയിൽ നടത്തിയ പ്രസംഗത്തിൽ അമീർ സൂചിപ്പിച്ചതും അദ്ദേഹം ആവർത്തിച്ചു.