November 17, 2019
November 17, 2019
ഖത്തറിലെ താമസ സ്ഥലത്തെ കൃത്യമായ മേൽവിലാസം,ഫോൺ നമ്പർ,മൊബൈൽ നമ്പർ, നാട്ടിലെ സ്ഥിര താമസ വിലാസം, തൊഴിലുടമയുടെ മേൽവിലാസം എന്നിവയാണ് നൽകേണ്ടത്
ദോഹ : ഖത്തറിൽ ദേശീയ മേൽവിലാസ നിയമം ഉടൻ പ്രാബല്യത്തിൽ വരുമെന്ന് ആഭ്യന്തര മന്ത്രാലയത്തിലെ ജനറൽ സെക്യൂരിറ്റി അഡ്രസ് വിഭാഗം മേധാവി ഡോക്ടർ അബ്ദുല്ല സെയ്ദ് അൽ സെഹ്ലി അറിയിച്ചു. പ്രാദേശിക പത്രത്തിന് നൽകിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്. രാജ്യത്തു താമസിക്കുന്ന സ്വദേശികളും വിദേശികളുമായ മുഴുവൻ ജനങ്ങളുടെയും പൂർണമായ മേൽവിലാസങ്ങൾ രേഖപ്പെടുത്തി സൂക്ഷിക്കുന്നതാണ് പദ്ധതി. പ്രവാസികൾ താമസിക്കുന്ന സ്ഥലത്തെ കൃത്യമായ മേൽവിലാസം, നാട്ടിലെ സ്ഥിരം മേൽവിലാസം,ഫോൺ നമ്പർ, മൊബൈൽ നമ്പർ, ഇ മെയിൽ,തൊഴിലുടമയുടെ വിലാസം എന്നിവയാണ് നൽകേണ്ടത്.
പ്രായപൂർത്തിയാവാത്ത കുട്ടികളെ സംബന്ധിച്ച വിവരങ്ങൾ രജിസ്റ്റർ ചെയ്യേണ്ടത് രക്ഷിതാക്കളുടെ ഉത്തരവാദിത്തമാണ്. മെട്രാഷ് - 2 ആപ്ലിക്കേഷൻ,ആഭ്യന്തര മന്ത്രാലയത്തിന്റെ സേവന കേന്ദ്രങ്ങൾ എന്നിവ വഴി വിവരങ്ങൾ നൽകാവുന്നതാണ്. ഉനൈസ സേവന കേന്ദ്രത്തിലെ ദേശീയ മേൽവിലാസ വിഭാഗത്തിലും ഇതിനുള്ള സൗകര്യമുണ്ടാകും. താമസ മേൽവിലാസത്തിൽ പിന്നീട് വരുന്ന മാറ്റങ്ങൾ മെട്രാഷ് - 2 വഴി പുതുക്കി നൽകാനാവും. രാജ്യത്തെ സ്വദേശികളും വിദേശികളുമായ മുഴുവൻ താമസക്കാർക്കും നിയമം ബാധകമായിരിക്കും. പദ്ധതി തുടങ്ങിയാൽ ആറു മാസത്തെ കാലാവധിയാണ് വിവരങ്ങൾ നൽകാൻ അനുവദിക്കുക. ഈ കാലയളവിന് ശേഷവും വിവരങ്ങൾ നൽകിയില്ലെങ്കിൽ 10,000 റിയാൽ പിഴ ഉൾപ്പെടെയുള്ള ശിക്ഷാ നടപടികൾ നേരിടേണ്ടിവരും.
നിയമം നടപ്പിലായാൽ ഉടൻ രജിസ്ട്രേഷൻ നടപടികൾ പൂർത്തിയാക്കണമെന്ന് രാജ്യത്തെ സ്വദേശികളും വിദേശികളുമായ മുഴുവൻ വ്യക്തികളോടും സ്ഥാപനങ്ങളോടും ആഭ്യന്തര മന്ത്രാലയം ആവശ്യപ്പെട്ടു.
(ന്യൂസ്റൂം വാർത്തകൾ മുടങ്ങാതെ ലഭിക്കാൻ +974 66200 167 എന്ന വാട്സാപ്പ് നമ്പറിലേക്ക് സന്ദേശമയക്കുക )