August 30, 2020
August 30, 2020
ദോഹ : ഖത്തറിൽ ഗാർഹിക തൊഴിലാളികൾ ഉൾപെടെ വിദേശ തൊഴിലാളികൾക്കുള്ള മിനിമം വേതനം പ്രഖ്യാപിച്ചു.ഖത്തർ അമീർ ശൈഖ് തമീം ബിൻ ഹമദ് അൽതാനിയാണ് ഞായറാഴ്ച ഇതുസംബന്ധിച്ച ഉത്തരവ് ഇറക്കിയത്. തൊഴിലാളികളുടെയും തൊഴിലുടമകളുടെയും അവകാശ സംരക്ഷണത്തിനായി രാജ്യത്ത് നടപ്പാക്കിവരുന്ന പരിഷ്കരണങ്ങളുടെ ഭാഗമായാണ് നടപടി.
പുതിയ ഉത്തരവ് അനുസരിച്ച് ഗാർഹിക തൊഴിലാളികൾ ഉൾപെടെ ഖത്തറിൽ ജോലി ചെയ്യുന്ന വിദേശ തൊഴിലാളിക്ക് നൽകേണ്ട ഏറ്റവും കുറഞ്ഞ പ്രതിമാസ അടിസ്ഥാന ശമ്പളം 1000 ഖത്തർ റിയാലാണ്.താമസ സൗകര്യവും ഭക്ഷണവും അനുവദിക്കുന്നില്ലെങ്കിൽ 500 റിയാൽ താമസത്തിനും 300 ഖത്തർ റിയാൽ ഭക്ഷണത്തിനും ഇതോടൊപ്പം അനുവദിക്കണം.ഉത്തരവ് ഗസറ്റില്‍ പ്രസിദ്ധീകരിച്ച് ആറ് മാസത്തിനകം നിയമം നിലവില്‍ വരും. ഭക്ഷണവും താമസവും ഉൾപെടെ 1500 റിയാലിൽ കുറഞ്ഞ വേതനം ലഭിക്കുന്നവരുടെ തൊഴില്‍ കരാര്‍ ഈ സമയത്തിനകം പുതുക്കണം. മിഡില്‍ ഈസ്റ്റില്‍ തന്നെ ആദ്യമായാണ് ഇത്തരമൊരു നിയമം നിലവില്‍ വരുന്നത്. മിനിമം വേതനം കാലാനുസൃമായി പുതുക്കുന്നതിന് മിനിമം വേജ് കമ്മിറ്റി രൂപീകരിക്കും.
തൊഴിലാളികളുടെയും തൊഴിലുടമകളുടെയും അവകാശങ്ങൾ ഉറപ്പു വരുത്തുന്ന തരത്തിൽ പ്രവാസികളുടെ വരവ്, പോക്ക്, താമസം സംബന്ധിച്ച നിയമവും ഭേദഗതി ചെയ്തിട്ടുണ്ട്. ഇതനുസരിച്ച് തൊഴിലാളിക്ക് നിലവിലുള്ള തൊഴിലുടമയുടെ എന്‍ഒസി കൂടാതെ തന്നെ മറ്റൊരു ജോലിയിലേക്ക് മാറാൻ കഴിയും.എന്നാൽ ഇതിന് ഉപാധികളുണ്ടാവുമെന്നാണ് സൂചന. ഇതുമായി ബന്ധപ്പെട്ട കൂടുതൽ വിവരങ്ങൾ അടുത്ത ദിവസങ്ങളിൽ തന്നെ ഉണ്ടാകുമെന്നാണ് പ്രതീക്ഷിക്കുന്നത്.
ന്യൂസ്‌റൂം വാർത്തകൾ ടെലഗ്രാമിൽ ലഭിക്കാൻ ഈ ലിങ്കിൽ ചേരുക.വാർത്തകൾ വാട്സ്ആപ്പിൽ ലഭിക്കാൻ +974 66200167 എന്ന നമ്പറിൽ ബന്ധപ്പെടുക.
