February 14, 2021
February 14, 2021
ദോഹ : ഖത്തറിൽ പഴയ കറൻസികൾ മാറ്റാനുള്ള സമയപരിധി മാർച്ച് 19 ന് അവസാനിക്കും.ഖത്തർ സെൻട്രൽ ബാങ്കിന്റെ നേരത്തെയുള്ള പ്രഖ്യാപന പ്രകാരം അടുത്ത മാസം 19 നു ശേഷം പഴയ നോട്ടുകൾ അസാധുവാകും.മാർച്ച് 19 വരെ പ്രാദേശിക ബാങ്കുകളിൽ നിന്നും അതിനു ശേഷം സെൻട്രൽ ബാങ്കിൽ നിന്നും പഴയ നോട്ടുകൾ മാറ്റിയെടുക്കാം.
ഇതിനിടെ,രാജ്യത്തെ എടിഎമ്മുകളും കാഷ് ഡിപ്പോസിറ്റ് മെഷീനുകളും പഴയ നോട്ടുകളും അഞ്ചാം സീരിസിലെ പുതിയ നോട്ടുകളും സ്വീകരിച്ചു തുടങ്ങിയിട്ടുണ്ട്.ഖത്തർ നാഷനൽ ബാങ്ക് (ക്യുഎൻബി), ഖത്തർ ഇസ്ലാമിക് ബാങ്ക് (ക്യുഐബി)എന്നിവയുടെയെല്ലാം എടിഎമ്മുകളിലും കാഷ് ഡിപ്പോസിറ്റ് മെഷീനുകളിലും പുതിയ നോട്ടുകളും സ്വീകരിക്കുമെന്ന് ബാങ്ക് അധികൃതർ കഴിഞ്ഞ ദിവസം ഉപഭോക്താക്കളെ അറിയിച്ചിരുന്നു.ഓരോ ഇടപാടുകൾക്കും 30 നോട്ടുകൾ വരെ ഡിപ്പോസിറ്റ് ചെയ്യാമെന്നും പ്രതിദിന പണനിക്ഷേപ പരിധി 50,000 റിയാൽ ആണെന്നും ക്യുഐബി വ്യക്തമാക്കിയിട്ടുണ്ട്. ഡിസംബർ 18 മുതൽ പുതിയ നോട്ടുകൾ പ്രാബല്യത്തിൽ വന്നിട്ടും എടിഎമ്മുകളിലും മറ്റും അവ സ്വീകരിക്കാത്തത് വലിയ ബുദ്ധിമുട്ടുകൾ സൃഷ്ടിച്ചിരുന്നു.
200 റിയാലിന്റെ പുതിയ കറൻസിയും ഡിസൈൻ രൂപമാറ്റങ്ങളോടു കൂടിയ അഞ്ചാം സീരിസിലെ 1, 5, 10, 50, 100, 500 നോട്ടുകളുമാണ് 2020 ഡിസംബർ 18 മുതൽ പ്രാബല്യത്തിലായത്.
ന്യൂസ്റൂം വാർത്തകൾക്കും തൊഴിൽ പരസ്യങ്ങൾ നൽകാനും +974 6620 0167 എന്ന വാട്സ്ആപ് നമ്പറിൽ സന്ദേശമയക്കുക.