November 24, 2019
November 24, 2019
ദോഹ : ഖത്തർ ദേശീയ ദിനം 2019 ന്റെ ആശയവാക്യം സാംസ്കാരിക-കായിക മന്ത്രാലയം പുറത്തുവിട്ടു. 'അൽ മആലി ഖായിദ' അഥവാ മികവിന്റെ പാത കഠിനമാണെന്ന ആശയത്തെ മുൻനിർത്തിയാണ് ഇത്തവണ രാജ്യം ദേശീയ ദിനം ആഘോഷിക്കുന്നത്. അറേബ്യൻ പെനിൻസുലയിലെ ഒരു മണൽതുരുത്ത് മാത്രമായിരുന്ന ഖത്തർ ഇന്നത്തെ നിലയിൽ ലോകമറിയുന്ന ആധുനിക രാജ്യമായി വളർന്നതിന്റെ നാൾവഴികളിൽ അന്നത്തെ തലമുറയും ഭരണാധികാരികളും നേരിട്ട പ്രയാസങ്ങളെ പുതിയ തലമുറയെ ഓർമിപ്പിക്കുന്നതാണ് മുദ്രാവാക്യം. ഖത്തറിന്റെ രാഷ്ട്രപിതാവായി അറിയപ്പെടുന്ന ശൈഖ് ജാസിം ബിൻ മുഹമ്മദ് ബിൻ താനി തന്റെ മകനെ അഭിസംബോധന ചെയ്തുകൊണ്ട് എഴുതിയ കവിതയിൽ നിന്നാണ് ഈ ആശയം സ്വീകരിച്ചത്.
പ്രതിസന്ധികളെ അതിജീവിച്ച് എല്ലാ മേഖലകളിലും കൈവരിച്ച ആത്മവിശ്വാസത്തിന്റെ കരുത്തുമായാണ് രാജ്യം ദേശീയ ആഘോഷിക്കാൻ ഒരുങ്ങുന്നത്. ഡിസംബർ 12 ന് ദർബൽസായി മൈതാനിയിലാണ് ആഘോഷ പരിപാടികൾക്ക് തുടക്കമാവുക. ഉപരോധത്തിന്റെ പശ്ചാത്തലത്തിൽ 'ഖത്തർ സ്വതന്ത്രമായി തുടരും' എന്ന ആശയത്തെ മുൻനിർത്തിയായിരുന്നു രാജ്യം കഴിഞ്ഞ തവണ ദേശീയ ദിനം ആഘോഷിച്ചത്.