March 19, 2023
March 19, 2023
ന്യൂസ്‌റൂം ബ്യൂറോ
റിയാദ്: ജീവകാരുണ്യമേഖലയിലെ സ്തുത്യര്‍ഹ സേവനത്തിന്റെ പേരില്‍ ലുലു ഗ്രൂപ്പ് മേധാവി എം.എ. യൂസഫലിക്ക് സൗദി ഭരണാധികാരിയുടെ ആദരം. സൗദി കിരീടവകാശി മുഹമ്മദ് ബിന്‍ സല്‍മാന്‍ രാജകുമാരന്റെ നേതൃത്വത്തില്‍ പ്രവര്‍ത്തിക്കുന്ന ഇഹ്‌സാന്‍ എന്ന സേവനസംഘടനയ്ക്ക് എം.എ. യൂസഫലി നല്‍കിയ പത്ത് ലക്ഷം റിയാലിന്റെ സംഭാവന സ്തുത്യര്‍ഹമായ കാല്‍വെപ്പാണെന്ന് റിയാദില്‍ സംഘടിപ്പിച്ച ചടങ്ങില്‍ സംസാരിച്ചവര്‍ അഭിപ്രായപ്പെട്ടു. സാമ്പത്തിക പ്രശ്‌നങ്ങളുടെ പേരില്‍ സൗദി ജയിലില്‍ കഴിയുന്ന ആളുകളെ സഹായിക്കുക, രാജ്യത്തിന്റെ വികസപ്രക്രിയയില്‍ പങ്കാളിയാകുക, ചാരിറ്റി പ്രവര്‍ത്തനങ്ങള്‍ ജനോപകാരപ്രദമാക്കുക തുടങ്ങി വിശാലമായ ലക്ഷ്യസാക്ഷാല്‍ക്കാരത്തിനായി പ്രവര്‍ത്തിക്കുന്ന സേവനസംഘടനയാണ് ഇഹ്‌സാന്‍. അമ്പത് ലക്ഷം പേര്‍ ഇഹ്‌സാന്‍ ചാരിറ്റിയുടെ ഗുണഭോക്താക്കളാണ്.
നാഷനല്‍ ഫോറം ഫോര്‍ ചാരിറ്റിബിള്‍ വര്‍ക്കിന്റെ രണ്ടാമത് വാര്‍ഷികച്ചടങ്ങില്‍ റിയാദ് ഗവര്‍ണര്‍ ഫൈസല്‍ ബിന്‍ ബന്ദര്‍ ബിന്‍ അബ്ദുല്‍ അസീസില്‍ നിന്ന് എം.എ. യൂസഫലിക്കുവേണ്ടി ലുലു സൗദി അറേബ്യ ഡയറക്ടര്‍ ഷഹീം മുഹമ്മദ് ആദരം ഏറ്റുവാങ്ങി. സൗദി ഡാറ്റാ ആന്റ് ആര്‍ട്ടിഫിഷ്യല്‍ ഇന്റലിജന്‍സ് അതോറിറ്റിയാണ് ചടങ്ങിന് നേതൃത്വം നല്‍കിയത്.
ന്യൂസ്‌റൂം ഗ്രൂപ്പുകളിൽ അംഗങ്ങളല്ലാത്തവർ മാത്രം ജോയിൻ ചെയ്യുക
https://chat.whatsapp.com/BA70KEJMeBmGW92ahNcBva
