November 26, 2021
November 26, 2021
ജിദ്ദ : കോവിഡ് പ്രതിസന്ധി രൂക്ഷമായതോടെ ഇന്ത്യയിൽ നിന്നും നേരിട്ട് പ്രവേശിക്കുന്നതിന് ഏർപ്പെടുത്തിയ വിലക്ക് സൗദി പിൻവലിക്കുന്നു. ഡിസംബർ ഒന്ന് മുതൽ ഇന്ത്യയിൽ നിന്നും നേരിട്ട് സൗദിയിലേക്ക് വിമാനസർവീസുകൾ ആരംഭിക്കുമെന്ന് അധികൃതർ വ്യക്തമാക്കി. ഇന്ത്യ ഉൾപ്പെടെ ആറ് രാജ്യങ്ങളുടെ യാത്രാവിലക്കാണ് നീക്കിയത്. ഇന്തോനേഷ്യ, പാകിസ്ഥാൻ, ബ്രസീൽ, വിയറ്റ്നാം, ഈജിപ്ത് എന്നിവയാണ് മറ്റ് രാജ്യങ്ങൾ.
സൗദിയിലെത്തേണ്ട പ്രവാസികൾ മറ്റേതെങ്കിലും രാജ്യത്ത് 14 ദിവസം ക്വാറന്റൈൻ ഇരുന്നതിന് ശേഷമേ സൗദിയിൽ പ്രവേശിക്കാവൂ എന്ന നിബന്ധനയാണ് ഇതോടെ ഇല്ലാതായത്. ഭീമമായ സംഖ്യ ഹോട്ടൽ ക്വാറന്റൈനിനും വിമാനടിക്കറ്റിനുമായി ചെലവഴിക്കേണ്ട ദുരവസ്ഥയിലായിരുന്നു പ്രവാസികൾ. സൗദിയിൽ എത്തിയ ശേഷം 14 ദിവസം ക്വാറന്റൈനിൽ കഴിയേണ്ടതില്ലെന്നും അധികൃതർ വ്യക്തമാക്കി. അഞ്ചുദിവസത്തെ ഇൻസ്റ്റിറ്റൂഷനൽ ക്വാറന്റൈൻ ആണ് പ്രവാസികൾക്കുള്ള നിർദേശം. സൗദിയിൽ നിന്നും വാക്സിൻ സ്വീകരിച്ചവർക്ക് ക്വാറന്റൈൻ വ്യവസ്ഥയിൽ ഇളവ് ലഭിച്ചേക്കുമെന്നും അധികൃതർ കൂട്ടിച്ചേർത്തു.