March 04, 2022
March 04, 2022
കീവ് : റഷ്യയുടെ ആക്രമണം രൂക്ഷമായ യുക്രൈനിൽ ഇന്ത്യൻ വിദ്യാർത്ഥിക്ക് വെടിയേറ്റതായി കേന്ദ്ര മന്ത്രി വി.കെ.സിങ് അറിയിച്ചു. പോളണ്ടിലെ വിമാനത്താവളത്തിൽ വെച്ച് ഇന്ത്യൻ മാധ്യമങ്ങളോട് സംസാരിക്കുകയായിരുന്നു മന്ത്രി. കീവിൽ നിന്നും പുറത്തുകടക്കാൻ ശ്രമിക്കുന്നതിനിടെയാണ് വെടിയേറ്റത്. വിദ്യാർത്ഥിയെ ആശുപത്രിയിൽ പ്രവേശിപ്പിച്ചു. ദിവസങ്ങൾക്ക് മുൻപാണ് ഒരു ഇന്ത്യൻ വിദ്യാർത്ഥി ഷെല്ലാക്രമണത്തിൽ കൊല്ലപ്പെട്ടത്.
കർണ്ണാടക സ്വദേശിയായ നവീൻ എന്ന 21 വയസുകാരനാണ് റഷ്യൻ ആക്രമണത്തിൽ ജീവൻ നഷ്ടപെട്ടത്. കീവിൽ നിന്നും പുറത്തുകടക്കാനുള്ള യാത്രക്ക് വേണ്ടി ഭക്ഷണം ശേഖരിക്കാൻ കടയിൽ വരി നിൽക്കവേ ആണ് നവീൻ കൊല്ലപ്പെട്ടത്. യുക്രൈനിലെ ഇന്ത്യക്കാരെ പുറത്തെത്തിക്കാൻ ശ്രമങ്ങൾ ഊർജിതമാക്കിയതായി മന്ത്രി അറിയിച്ചു. ഇന്ത്യക്കാരുടെ രക്ഷാപ്രവർത്തനം ഏകീകരിക്കാൻ, യുക്രൈന്റെ അയൽ രാജ്യങ്ങളിലേക്ക് ഇന്ത്യൻ സർക്കാർ അയച്ച നാൽവർ സംഘത്തിൽ അംഗമാണ് മന്ത്രി. ഓപ്പറേഷൻ ഗംഗയിലൂടെ ഏതാണ്ട് ആറായിരത്തോളം ഇന്ത്യക്കാർ സുരക്ഷിതരായി തിരികെ എത്തിയതായി മന്ത്രി അറിയിച്ചു.