March 27, 2022
March 27, 2022
മനാമ : ഹിജാബ് ധരിച്ച സ്ത്രീക്ക് പ്രവേശനം നിഷേധിച്ച ഇന്ത്യൻ റെസ്റ്റോറന്റ് അധികൃതർ പൂട്ടിച്ചു. അദ്ലിയ പ്രദേശത്തെ പ്രശസ്തമായ ഇന്ത്യൻ റെസ്റ്റോറന്റുകളിൽ ഒന്നിനെതിരെയാണ് അധികൃതർ നടപടി സ്വീകരിച്ചത്. വിഷയത്തിൽ വിശദമായ അന്വേഷണം നടത്തുമെന്നും അധികൃതർ പ്രഖ്യാപിച്ചിട്ടുണ്ട്. ഹിജാബ് ധരിച്ചെത്തിയ സ്ത്രീയെ റെസ്റ്റോറന്റിലെ ജീവനക്കാരിലൊരാൾ തടയുന്ന ദൃശ്യങ്ങൾ സമൂഹമാധ്യമങ്ങൾ വഴിയാണ് പ്രചരിച്ചത്.
പിന്നാലെ ടൂറിസം ആൻഡ് എക്സിബിഷൻ അതോറിറ്റി നടപടി സ്വീകരിക്കുകയായിരുന്നു. ജനങ്ങളെ വേർതിരിച്ചു കാണുന്ന ഒരു നടപടിയെയും പ്രോത്സാഹിപ്പിക്കില്ലെന്നും അധികൃതർ വ്യക്തമാക്കി. സംഭവം വിവാദമായതോടെ ഹോട്ടൽ മാനേജ്മെന്റ് ഖേദപ്രകടനവുമായി രംഗത്തെത്തി. ജീവനക്കാരന് പറ്റിയ പിഴവാണെന്നാണ് സമൂഹമാധ്യമങ്ങളിൽ പോസ്റ്റ് ചെയ്ത ക്ഷമാപണത്തിലൂടെ മാനേജ്മെന്റ് അറിയിച്ചത്. സംഭവത്തിൽ കൂടുതൽ നിയമനടപടികൾ ഉണ്ടായേക്കുമെന്ന സൂചനയും ടൂറിസം മന്ത്രാലയം നൽകി. സമാനമായ പ്രശ്നങ്ങൾ ശ്രദ്ധയിൽ പെട്ടാൽ 17007003 എന്ന നമ്പറിൽ അറിയിക്കണമെന്നും അധികൃതർ അറിയിച്ചു.