October 03, 2019
October 03, 2019
ദോഹ : ഖത്തര്‍ ആതിഥ്യമരുളുന്ന ലോക അത്‌ലറ്റിക്‌സ് ചാംപ്യന്‍ഷിപ്പിനെ മുക്തകണ്ഠം പ്രശംസിച്ച് ഇന്റര്‍നാഷനല്‍ അസോസിയേഷന്‍ ഓഫ് അത്‌ലറ്റിക്‌സ് ഫെഡറേഷന്‍സ്(ഐ.എ.എ.എഫ്). ലോക അത്‌ലറ്റിക്‌സ് ചാംപ്യന്‍ഷിപ്പിന്റെ ചരിത്രത്തിലെ ഏറ്റവും മികച്ച ചാമ്പ്യൻഷിപ്പാണ് ദോഹയില്‍ നടക്കുന്നതെന്ന് ഐ.എ.എ.എഫ് പ്രസിഡന്റ് സെബാസ്റ്റ്യന്‍ കോ പറഞ്ഞു.
ഇത്രയും മികച്ച രീതിയില്‍ നടന്നൊരു ലോക ചാംപ്യന്‍ഷിപ്പ് ദീര്‍ഘകാലമായി എനിക്ക് ഓര്‍ത്തെടുക്കാനാകുന്നില്ല. ട്രാക്കിലെ പ്രകടനങ്ങളുടെ നിലവാരം കാണികള്‍ കുറവാണെന്ന പരാതികളെയെല്ലാം കവച്ചുവയ്ക്കുന്നതാണ്. ദോഹയില്‍ നടക്കുന്ന ലോക ചാംപ്യന്‍ഷിപ്പ് വന്‍ വിജയമാണെന്നാണ് ഇത് നൽകുന്ന സൂചന.800 മീറ്റര്‍ ഫൈനലില്‍ ഡൊനാവന്‍ ബ്രേസിയറിന്റെയും 400 മീറ്റര്‍ ഹര്‍ഡില്‍സില്‍ നോര്‍വേയുടെ കാസ്റ്റണ്‍ വാര്‍ഹോമിന്റെയും മിന്നും പ്രകടനങ്ങള്‍ മറ്റ് ഉദാഹരണങ്ങളാണ്-സെബാസ്റ്റ്യന്‍ കോ കൂട്ടിച്ചേര്‍ത്തു.
ദോഹ അത്‌ലറ്റിക്‌സ് മീറ്റിലെ കാണികളുടെ പങ്കാളിത്തം സംബന്ധിച്ച പ്രചാരണങ്ങള്‍ തള്ളിക്കൊണ്ടാണു മികച്ച സംഘാടനവും മത്സരങ്ങളും എടുത്തുപറഞ്ഞ് ഐ.എ.എ.എഫ് തലവന്‍ ഖത്തറിനെ പ്രശംസിച്ചത്. മത്സരങ്ങള്‍ വീക്ഷിക്കാനെത്തുന്ന കാണികളുടെ എണ്ണം കഴിഞ്ഞ വാരാന്ത്യത്തോടെ മെച്ചപ്പെട്ടിട്ടുണ്ടെന്നും കോ സൂചിപ്പിച്ചു. ഉപരോധം അടക്കമുള്ള പ്രാദേശിക പ്രശ്‌നങ്ങള്‍ ചാംപ്യന്‍ഷിപ്പിനെ ബാധിച്ചിട്ടുണ്ടെന്നും അദ്ദേഹം അഭിപ്രായപ്പെട്ടു.
