February 12, 2021
February 12, 2021
ദോഹ: ഖത്തറിന്റെ കൊവിഡ്-19 കോണ്‍ടാക്റ്റ് ട്രേസിങ് മൊബൈല്‍ ആപ്ലിക്കേഷനായ ഇഹ്തറാസ് ആപ്പിന്റെ പുതിയ അപ്‌ഡേറ്റ് പൊതുജനാരോഗ്യ മന്ത്രാലയം പുറത്തിറക്കി. പുതിയ ചില ഫീച്ചറുകള്‍ ഉള്‍പ്പെടുത്തിയ അപ്‌ഡേറ്റാണ് മന്ത്രാലയം പുറത്തിറക്കിയത്. ട്വിറ്ററിലൂടെയാണ് മന്ത്രാലയം ഇക്കാര്യം അറിയിച്ചത്.
അപ്‌ഡേറ്റ് ചെയ്ത ഇഹ്തറാസ് ആപ്പില്‍ വ്യക്തികളുടെ വാക്‌സിനേഷന്‍ സംബന്ധിച്ച വിവരം കാണിക്കും. കൊവിഡ് പ്രതിരോധ വാക്‌സിന്റെ രണ്ട് ഡോസുകളും സ്വീകരിച്ചവര്‍ക്ക് അവസാന ഡോസ് സ്വീകരിച്ച് ഏഴ് ദിവസത്തിന് ശേഷം ഇത് അവരുടെ ഇഹ്തറാസ് ആപ്പില്‍ പ്രദര്‍ശിപ്പിക്കും.
ആപ്പിലെ ക്യു.ആര്‍ കോഡിന് ചുറ്റും സ്വര്‍ണ്ണവര്‍ണ്ണത്തിലുള്ള ഫ്രെയിമായാണ് വ്യക്തികളുടെ വാക്‌സിനേഷന്‍ സ്റ്റാറ്റസ് കാണിക്കുക. കൂടാതെ വാക്‌സിന്‍ സ്വീകരിച്ചു എന്ന് സൂചിപ്പിക്കുന്ന സ്റ്റാമ്പ് ഇമേജും ആപ്പില്‍ ദൃശ്യമാകും. അതേസമയം ക്യു.ആര്‍ കോഡിന്റെ നിറം ഓരോ വ്യക്തിയുടെയും അവസ്ഥ അനുസരിച്ച് നാല് നിറങ്ങളില്‍ ഒന്നായാണ് കാണിക്കുക. വാക്‌സിന്റെ മുഴുവന്‍ ഡോസും സ്വീകരിച്ചവരുടെ ക്യു.ആര്‍ കോഡിന് ഗോള്‍ഡന്‍ ഫ്രെയിം ഉണ്ടാവുമെന്നതിനാല്‍ ഇക്കാര്യത്തില്‍ ആശങ്ക വേണ്ടതില്ല.
'വാക്‌സിനേഷന്‍' എന്ന പുതിയ ടാബും പുതിയ ഇഹ്തറാസ് ആപ്പില്‍ ഉണ്ട്. ഇതില്‍ വാക്‌സിനേഷന്‍ സംബന്ധിച്ച വിശദാംശങ്ങളാണ് ഉണ്ടാവുക. ഓരോ ഡോസും സ്വീകരിക്കുന്ന തിയ്യതി, വാക്‌സിന്റെ പേര് തുടങ്ങിയ വിവരങ്ങളാണ് ഇതില്‍ ഉണ്ടാവുക.
അതേസമയം, ഇഹ്തറാസ് ആപ്പില്‍ വാക്‌സിനേഷന്‍ സ്റ്റാറ്റസ് കാണിക്കുന്നു എന്നതിനാല്‍ നിലവില്‍ സര്‍ക്കാര്‍ നിര്‍ദ്ദേശിച്ച കൊവിഡ് പ്രോട്ടോക്കോളില്‍ യാതൊരു മാറ്റവും ഉണ്ടാകില്ല. വാക്‌സിന്‍ സ്വീകരിച്ചവര്‍ ഉള്‍പ്പെടെ എല്ലാവരും സാമൂഹ്യ അകലം പാലിക്കുകയും മാസ്‌ക് ധരിക്കുകയും കൈകള്‍ സോപ്പ് ഉപയോഗിച്ച് കഴുകുകയും സാനിറ്റൈസര്‍ ഉപയോഗിച്ച വൃത്തിയാക്കുകയും ആവശ്യമെങ്കില്‍ ക്വാറന്റൈനില്‍ ഇരിക്കുകയുമെല്ലാം ചെയ്യുന്നത് തുടരണമെന്നും മന്ത്രാലയം ഓര്‍മ്മിപ്പിച്ചു.
ന്യൂസ് റൂം വാർത്തകൾ ഫേസ്ബുക്കിൽ ലഭിക്കാനായി ഇവിടെ ക്ലിക്ക് ചെയ്ത് പേജ് ലൈക്ക് ചെയ്യൂ.
ന്യൂസ് റൂം വാര്‍ത്തകള്‍ ടെലിഗ്രാമില്‍ മുടങ്ങാതെ ലഭിക്കാനായി ഇവിടെ ക്ലിക്ക് ചെയ്യൂ.
ന്യൂസ് റൂം വാര്‍ത്തകള്‍ വാട്ട്‌സ്ആപ്പില്‍ മുടങ്ങാതെ ലഭിക്കാനായി ഇവിടെ ക്ലിക്ക് ചെയ്ത് മെസേജ് അയക്കൂ.
