January 20, 2020
January 20, 2020
ദോഹ : ഖത്തറിൽ വിദേശ തൊഴിലാളികളുടെ അവകാശ സംരക്ഷണത്തിനായി ഈയിടെ പ്രഖ്യാപിച്ച തൊഴിൽ ഭേദഗതി നിയമത്തെ യൂറോപ്യൻ യൂണിയൻ പ്രശംസിച്ചു. പുതിയ ഭേദഗതികളെ ശക്തമായി പിന്തുണക്കുന്നതായി 28 അംഗരാജ്യങ്ങൾ ഉൾപെട്ട യൂറോപ്യൻ യൂണിയന്റെ ഔദ്യോഗിക വക്താവ് പ്രസ്താവനയിൽ വ്യക്തമാക്കി. മനുഷ്യാവകാശങ്ങളുമായി ബന്ധപ്പെട്ട അനൗദ്യോഗിക ചർച്ചകളിൽ ദീർഘകാലം ഇക്കാര്യങ്ങൾ ഖത്തറുമായി ചർച്ചനടത്തിയിരുന്നുവെന്നും യൂറോപ്യൻ യൂണിയൻ വെബ്‌സൈറ്റിൽ പ്രസിദ്ധീകരിച്ച പ്രസ്താവനയിൽ വിശദീകരിച്ചു.
രാജ്യത്തെ വിദേശ തൊഴിലാളികളുടെ ജീവിത സാഹചര്യം മെച്ചപ്പെടുത്തുന്നതിനും അവകാശ സംരക്ഷണത്തിനുമായി നിരവധി ഭേദഗതികളാണ് കഴിഞ്ഞ കുറച്ചുകാലങ്ങളായി ഖത്തർ പ്രാബല്യത്തിൽ വരുത്തിയത്. ഗാർഹിക തൊഴിലാളികൾ ഒഴികെയുള്ള എല്ലാ വിദേശികൾക്കും എക്സിറ്റ് പെർമിറ്റില്ലാതെ സ്ഥിരമായോ താത്കാലികമായോ രാജ്യം വിടാൻ അനുമതി നൽകുമെന്ന് കഴിഞ്ഞ ദിവസം തൊഴിൽ സാമൂഹ്യ മന്ത്രാലയം അറിയിച്ചിരുന്നു. അതേസമയം,ഗാർഹിക തൊഴിലാളികൾക്ക് രാജ്യത്തിന് പുറത്തു പോകണമെങ്കിൽ 72 മണിക്കൂർ മുമ്പ് സ്പോൺസറിൽ നിന്നും മുൻ‌കൂർ അനുമതി വാങ്ങിയിരിക്കണം.
