July 04, 2021
July 04, 2021
മക്ക:ഹജ്ജിന്റെ പ്രധാന ചടങ്ങായ അറഫാ സംഗമം ജൂലൈ 19ന് തിങ്കളാഴ്ചയായിരിക്കാന്‍ സാധ്യതയെന്ന് സഊദിയിലെ ഗോളശാസ്ത്ര ഗവേഷകര്‍. ദുല്‍ഖഅദ് മാസത്തില്‍ മുപ്പത് ദിവസം പൂര്‍ത്തിയാക്കി ജൂലൈ 11ന് ദുല്‍ഹജ്ജ് ഒന്ന് ആകാനാണ് സാധ്യതയെന്നാണ് ഗോളശാസ്ത്ര ഗവേഷകര്‍ നല്‍കുന്ന സൂചന. ഇത് ശരിയായാല്‍ ഹജ്ജിന്റെ പ്രധാന ചടങ്ങായ അറഫാസംഗമം ജുലൈ 19ന് തിങ്കളാഴ്ചയും, ബലിപെരുന്നാള്‍ ജുലൈ 20ന് ചൊവ്വാഴ്ചയുമായിരിക്കും. അതിനിടെ ഹജ്ജിന് പോകുന്ന തീര്‍ത്ഥാടകര്‍ക്കുള്ള കോവിഡ് വാക്‌സിന്റെ രണ്ടാം ഡോസിന്റെ വിതരണം ആരംഭിച്ചു. കോവിഡ് പശ്ചാത്തലത്തില്‍ കടുത്ത നിയന്ത്രണങ്ങളോടെയാണ് ഇത്തവണയും ഹജ്ജ് കര്‍മ്മങ്ങള്‍ നടക്കുക. ഹജ്ജ് നടക്കുന്ന അഞ്ച് ദിവസവും തീര്‍ത്ഥാടകര്‍ക്കുള്ള ഭക്ഷണങ്ങള്‍ പ്രത്യേകം പാക്കറ്റുകളിലാണ് വിതരണം ചെയ്യുക. ഇതിനായി അറുപതിനായിരത്തോളം വരുന്ന തീര്‍ത്ഥാടകര്‍ക്ക് പത്തുലക്ഷത്തോളം ഭക്ഷണപ്പൊതികള്‍ വിതരണം ചെയ്യും.ഭക്ഷണത്തിന്റെ ഗുണനിലവാരം ഉറപ്പുവരുത്തുന്നതിനും നിരീക്ഷിക്കുന്നതിനും പ്രത്യേക വിഭാഗത്തെ ചുമതലപ്പെടുത്തി. രണ്ട് ഡോസ് വാക്‌സിനും സ്വീരിച്ചവര്‍ക്കുമാത്രമേ ഹജ്ജിന് അനുമതി നല്‍കുകയുള്ളൂ. ആദ്യ ഡോസ് സ്വീകരിച്ച തീര്‍ത്ഥാടകര്‍ക്കുള്ള രണ്ടാമത്തെ ഡോസിന്റെ വിതരണം ഇതിനകം ആരംഭിച്ചിട്ടുണ്ട്. ഹജ്ജ് കര്‍മ്മങ്ങളില്‍ പങ്കെടുക്കുമെന്ന് തെളിയിക്കുന്നതിനുള്ള രേഖകളുമായി വാക്‌സിനേഷന്‍ കേന്ദ്രങ്ങളിലെത്തിയാല്‍ രണ്ടാമത്തെ ഡോസ് സ്വീകരിക്കാം. കൂടാതെ സീസണല്‍ ഇന്‍ഫ്‌ളുവന്‍സ, മെനിഞ്ചറ്റിസ് എന്നീ വാക്‌സിനുകളും തീര്‍ത്ഥാടകര്‍ക്കും ഹജ്ജ് സേവകര്‍ക്കും ആരോഗ്യ കേന്ദ്രങ്ങളില്‍ നല്‍കുന്നുണ്ട്.
