November 24, 2019
November 24, 2019
ദോഹ : 26 ന് നടക്കാനിരിക്കുന്ന അറേബ്യൻ ഏഷ്യൻ കപ്പ് ടൂർണമെന്റിൽ പങ്കെടുക്കാനുള്ള ടീമുകളും ഫുട്ബോൾ ഫെഡറേഷൻ അംഗങ്ങളും ദോഹയിൽ എത്തിതുടങ്ങി. ഒമാനിൽ നിന്നുള്ള ഫുട്ബോൾ താരങ്ങളും ദേശീയ ഫുടബോൾ ഫെഡറേഷൻ അംഗങ്ങളും ഉൾപെട്ട 27 അംഗ സംഘമാണ് കഴിഞ്ഞ ദിവസം ദോഹയിലെത്തിയത്. ഒമാന്റെ പരമ്പരാഗത വേഷം ധരിച്ചെത്തിയ സംഘത്തെ ദോഹാ രാജ്യാന്തര വിമാനത്താവളത്തിൽ സ്വീകരിച്ചു. ഖത്തർ ഫുട്ബോൾ അസോസിയേഷൻ ഉന്നത തല പ്രതിനിധികൾ സംഘത്തിന് വരവേൽപ് നൽകി. സൗദി അറേബ്യ,ബഹ്‌റൈൻ,കുവൈത്ത് എന്നീ ടീമുകൾ ഉൾപ്പെട്ട ബി ഗ്രൂപ്പിലാണ് ഒമാൻ മത്സരിക്കുക. ബുധനാഴ്ച ഖലീഫാ രാജ്യാന്തര സ്റ്റേഡിയത്തിൽ സൗദിയുമായാണ് ഒമാന്റെ ആദ്യ മത്സരം.
സൗദി,യു.എ.ഇ,ബഹ്‌റൈൻ എന്നിവ ഉൾപെടെ മറ്റുരാജ്യങ്ങളിൽ നിന്നുള്ള കളിക്കാരും ഒഫീഷ്യലുകളും ഇന്നും നാളെയുമായി ദോഹയിൽ എത്തും. ആതിഥേയരായ ഖത്തറിനെ കൂടാതെ സൗദി അറേബ്യ, യുഎഇ, ഇറാഖ്, ബഹ്‌റൈൻ, യമൻ, കുവൈത്ത്,ഒമാൻ എന്നിവയാണ് മത്സര രംഗത്തുള്ളത്. ഫൈനൽ ഉൾപ്പെടെ 15 മത്സരങ്ങളാണുള്ളത്. ഡിസംബർ 2 നാണ് ഖത്തറും യുഎഇയും തമ്മിലുള്ള മത്സരം.. ഡിസംബർ 5ന് സെമി ഫൈനലും 8ന് ഫൈനലും നടക്കും. ഖലീഫ രാജ്യാന്തര സ്റ്റേഡിയത്തിലാണ് ഫൈനൽ മത്സരം നടക്കുക. ഷെഡ്യുൾ പുതുക്കി നിശ്ചയിച്ചതിനു ശേഷം ശേഷം ടിക്കറ്റ് വിൽപന ഇന്നലെ മുതൽ പുനരാരംഭിച്ചിട്ടുണ്ട്. സൂഖ് വാഖിഫ്, കത്താറ, വില്ലാജിയോ മാൾ, മാൾ ഓഫ് ഖത്തർ, ദോഹ ഫെസ്റ്റിവൽ സിറ്റി എന്നിവിടങ്ങളിൽ വൈകിട്ട് 4 മുതൽ 10 വരെ ടിക്കറ്റ് ലഭിക്കും. gulfcup2019.qa എന്ന വെബ്‌സൈറ്റ് വഴിയും ടിക്കറ്റുകൾ ലഭിക്കും. 10, 30, 50 റിയാൽ എന്നിങ്ങനെയാണ് ടിക്കറ്റ് നിരക്കുകൾ.
