July 28, 2019
July 28, 2019
ദുബായ് : ദുബായിൽ നിന്നും കൊച്ചിയിലേക്കുള്ള എയർ ഇന്ത്യ വിമാനം 24 മണിക്കൂർ പിന്നിട്ടിട്ടും പുറപ്പെടാത്തതിനാൽ യാത്രക്കാർ ദുരിതത്തിലായി.ഇന്നലെ(ശനിയാഴ്ച) ഉച്ചയ്ക്ക് പ്രാദേശിക സമയം 1.30 ന് പുറപ്പെടേണ്ടിയിരുന്ന എ.ഐ 934 വിമാനമാണ് യാത്ര വൈകിക്കുന്നത്. സാങ്കേതിക തകരാറാണ് വിമാനം വൈകാൻ കാരണമെന്നാണ് അധികൃതരുടെ വിശദീകരണം. എന്നാൽ കൊച്ചിയിലേക്ക് പോകേണ്ട യാത്രക്കാർ ദുബായ് വിമാനത്താവളത്തിലെത്തി ബോഡിങ് പാസ് എടുത്തു പുറപ്പെടുന്നതിന് ഒരു മണിക്കൂർ മുമ്പ് മാത്രമാണ് വിമാനം വൈകുമെന്ന വിവരം അധികൃതർ അറിയിച്ചതെന്ന് യാത്രക്കാർ പറഞ്ഞു.യാത്രക്കാരെ പിന്നീട് ഹോട്ടലിലേക്ക് മാറ്റിയെങ്കിലും 24 മണിക്കൂർ കഴിഞ്ഞിട്ടും യാത്ര തിരിക്കാത്തതിനാൽ യാത്രക്കാർ വിമാനത്താവളത്തിൽ ബഹളം വെക്കുകയാണ്.
പ്രായമായവരും പിഞ്ചുകുട്ടികളുമടക്കം മുന്നൂറോളം യാത്രക്കാരാണ് വിമാനം വൈകുന്നത് മൂലം ദുരിതമനുഭവിക്കുന്നത്. അതേസമയം ഇന്ന് പുറപ്പെടേണ്ട മറ്റ് വിമാനങ്ങളും വൈകുന്ന സാഹചര്യമാണ് നിലവിലുള്ളത്.എയർ ഇന്ത്യ അധികൃതരുമായി ബന്ധപ്പെടാൻ ശ്രമിച്ചെങ്കിലും വിമാനം എപ്പോൾ പുറപ്പെടുമെന്നത് സംബന്ധിച്ച് കൃത്യമായ വിവരം ലഭിക്കുന്നില്ലെന്നും യാത്രക്കാർ പരാതിപ്പെട്ടു.