August 29, 2021
August 29, 2021
കാബൂൾ : അഫ്ഗാനിസ്ഥാനിലെ നാടോടി ഗായകനായ ഫവാദ് അൻദറാബിയെ താലിബാൻ പൈശാചികമായി വധിച്ചുവെന്ന് മുൻ ആഭ്യന്തരവകുപ്പ് മന്ത്രി മസൗദ്‌ അൻദറാബി. ട്വിറ്ററിലൂടെയാണ് മുൻമന്ത്രി ഈ വാർത്ത പുറത്ത് വിട്ടത്. നേരത്തെ, ഹാസ്യതാരം നാസർ മുഹമ്മദിനെ താലിബാൻ വധിച്ചത് അന്താരാഷ്ട്രതലത്തിൽ തന്നെ ചർച്ചയായിരുന്നു. അഫ്ഗാനിലെ പ്രശസ്ത പോപ്പ് ഗായിക അരിയാന സയീദ് നേരത്തെ ഇസ്താംബുളിലേക്ക് രക്ഷപെട്ടിരുന്നു. ഇൻസ്റ്റാഗ്രാം പോസ്റ്റിലൂടെ അരിയാന തന്നെയാണ് ഇക്കാര്യം ലോകത്തെ അറിയിച്ചത്.
താലിബാൻ ഭരണത്തിനെതിരെ ചെറുത്തുനിൽപ്പ് നടത്തുന്ന പഞ്ച്ഷിർ താഴ്‌വരയിലെ അൻദറാബ് ഗ്രാമത്തിൽ വെച്ചാണ് ഫവാദ് കൊല്ലപ്പെട്ടത്. സംഗീതം ഇസ്‌ലാമിൽ നിഷിദ്ധമാണെന്ന നിലപാട് താലിബാൻ പല തവണ വ്യക്തമാക്കിയിട്ടുണ്ട്.. 1996-2001 കാലയളവിലെ ഭരണത്തെക്കാൾ നിലവിൽ ഭേദമാണ് താലിബാന്റെ രണ്ടാം ഭരണമെങ്കിലും, കാര്യങ്ങൾ കൈവിട്ട് പോകുമോ എന്ന ആശങ്ക പലകോണുകളിൽ നിന്നും ഉയരുന്നുണ്ട്. "ഒരു ഇസ്‌ലാം മതവിശ്വാസിയെ സംബന്ധിച്ചിടത്തോളം സംഗീതം അവന് വിലക്കപ്പെട്ടതാണ്, ആളുകളിൽ സമ്മർദ്ദം ചെലുത്താതെ തന്നെ അവർ സംഗീതം ഉപേക്ഷിക്കുമെന്ന പ്രതീക്ഷയിലാണ് ഞങ്ങൾ", താലിബാൻ നേതാവ് സബിഹുള്ള മുജാഹിദ് ന്യൂയോർക്ക് ടൈംസിനോട് പ്രതികരിച്ചത് ഇപ്രകാരമാണ്. സ്ത്രീകളും കുട്ടികളും വീടുകളിൽ തന്നെ തുടരാനും മുജാഹിദ് ഓർമപ്പെടുത്തി.
ന്യൂസ്‌റൂം വാർത്തകൾ മുടങ്ങാതെ ലഭിക്കാൻ 66200167 എന്ന ഖത്തർ വാട്സ്ആപ് നമ്പറിലേക്ക് സന്ദേശം അയക്കുക
