December 16, 2023
December 16, 2023
കുവൈത്ത് സിറ്റി: കുവൈത്ത് അമീര്‍ ഷെയ്ഖ് നവാഫ് അല്‍ അഹമ്മദ് അല്‍ ജാബര്‍ അല്‍ സബാഹ് അന്തരിച്ചു. 86 വയസ്സായിരുന്നു. കഴിഞ്ഞ കുറച്ചുനാളുകളായി അസുഖ ബാധിതനായിരുന്നു. മരണം അമീരി ദിവാന്‍ സ്ഥിരീകരിച്ചു. അമീറിന്റെ മരണത്തില്‍ അതീവ ദുഃഖം രേഖപ്പെടുത്തുന്നതായും കുടുംബത്തോടൊപ്പം ദുഃഖത്തില്‍ പങ്കുചേരുന്നതായും കുവൈത്ത് ടെലിവിഷന്‍ സംപ്രേക്ഷണം ചെയ്ത പ്രസ്താവനയിലൂടെ അമീരി ദിവാന്‍ അറിയിച്ചു.
സംസ്ഥാനത്ത് 40 ദിവസത്തെ ഔദ്യോഗിക ദുഃഖാചരണം പ്രഖ്യാപിച്ചു. ഇന്നുമുതല്‍ (ശനി) മൂന്ന് ദിവസത്തേക്ക് ഔദ്യോഗിക വകുപ്പുകള്‍ക്ക് അവധിയും പ്രഖ്യാപിച്ചു. നവംബര്‍ അവസാനത്തോടെ ആരോഗ്യസ്ഥിതി മോശമായതിനെ തുടര്‍ന്ന് അദ്ദേഹത്തെ ആശുപത്രിയില്‍ പ്രവേശിപ്പിച്ചിരുന്നു.
ഷെയ്ഖ് സബാഹ് അല്‍ അഹമ്മദ് അല്‍ സബാഹിന്റെ മരണത്തെ തുടര്‍ന്ന് 2020ലാണ് ഷെയ്ഖ് നവാഫ് കുവൈത്ത് അമീറായി സത്യപ്രതിജ്ഞ ചെയ്ത് ചുമതലയേറ്റത്. 1921 മുതല്‍ 1950 വരെ കുവൈത്ത് ഭരണാധികാരിയായിരുന്ന ഷെയ്ഖ് അഹമ്മദ് അല്‍ ജാബര്‍ അല്‍ സബാഹിന്റെ അഞ്ചാമത്തെ മകനായി 1937ലാണ് ജനനം. 25-ാം വയസ്സില്‍ ഹവല്ലി പ്രവശ്യയുടെ ഗവര്‍ണറായി രാഷ്ട്രീയ ജീവിതം ആരംഭിച്ചു. 1978ല്‍ കുവൈത്തിന്റെ ആഭ്യന്തര മന്ത്രിയായി പ്രവര്‍ത്തിച്ചിട്ടുണ്ട്.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/CIEQF0ymerI3E7Kl0Fortt
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
