November 14, 2023
November 14, 2023
കുവൈത്ത് സിറ്റി: കുവൈത്തില് സര്ക്കാര് ഓണ്ലൈന് ആപ്ലിക്കേഷനായ സഹേല് ആപ്പില് ഗാര്ഹിക തൊഴിലാളികളുടെ വിസ മാറ്റത്തിനുള്ള സേവനങ്ങള് കൂടി ഉള്പ്പെടുത്തി. പുതിയ ഫീച്ചര് അവതരിപ്പിച്ചതോടെ ഒരു സ്പോണ്സറുടെ കീഴില് നിന്ന് മറ്റൊരു സ്പോണ്സര്ഷിപ്പിലേക്ക് ഗാര്ഹിക തൊഴിലാളികള്ക്ക് ഇനിമുതല് എളുപ്പത്തില് സഹേല് ആപ്പ് വഴി മാറാന് സാധിക്കും. ആഭ്യന്തര മന്ത്രാലയത്തിലെ ജനറല് അഡ്മിനിസ്ട്രേഷന് ഓഫ് ഇന്ഫര്മേഷന് സിസ്റ്റവും നാഷണാലിറ്റി ആന്റ് റെസിഡന്സ് അഫയേഴ്സ് വിഭാഗവും സഹകരിച്ചാണ് പുതിയ പദ്ധതി ആവിഷ്കരിച്ചതെന്ന് മന്ത്രാലയത്തിന്റെ ജനറല് ഡിപ്പാര്ട്ട്മെന്റ് ഓഫ് സെക്യൂരിറ്റി റിലേഷന്സ് ആന്ഡ് മീഡിയ പത്രക്കുറിപ്പില് അറിയിച്ചു.ഓണ്ലൈനായി ലഭിക്കുന്ന അപേക്ഷകള് ഉടന് തന്നെ അവലോകനം ചെയ്ത് ആവശ്യമായ നടപടികള് സ്വീകരിക്കുമെന്നും അപേക്ഷയുടെ സ്റ്റാറ്റസ് ഓണ്ലൈനായി അപ്ഡേറ്റ് ചെയ്യുമെന്നും അധികൃതര് അറിയിച്ചു.
സ്പോണ്സര്ഷിപ്പ് മാറ്റത്തിനായി നിലവിലെ സ്പോണ്സറാണ് സഹേല് ആപ്പിലൂടെ നടപടിക്രമങ്ങള് ആരംഭിക്കേണ്ടത്. തുടര്ന്ന്, അപേക്ഷയിലൂടെ ലഭിക്കുന്ന അറിയിപ്പ് വഴി പുതിയ സ്പോണ്സര് വിസ മാറ്റത്തിനുള്ള നടപടികള് പൂര്ത്തിയാക്കണം. സ്പോണ്സര്ഷിപ്പ് മാറ്റുമ്പോള് ജോലിക്കാരും സ്പോണ്സറും തമ്മില് നിയമപ്രകാരമുള്ള പുതിയ തൊഴില് കരാര് ഉണ്ടാക്കേണ്ടത് നിര്ബന്ധമാണ്. 18 വയസ്സ് പൂര്ത്തിയാകുകയും വിവാഹിതരുമായ സ്വദേശികള്ക്കാണ് രാജ്യത്ത് ഗാര്ഹിക തൊഴിലാളികളെ സ്പോണ്സര് ചെയ്യാന് കഴിയൂ.
അതേസമയം ഗാര്ഹിക തൊഴിലാളികളായ ആര്ട്ടിക്കിള് (20) വിഭാഗത്തില് വരുന്ന സ്ത്രീകള്ക്ക് മാത്രമാണ് തുടക്കത്തില് സഹേല് ആപ്പ് വഴി വിസ മാറ്റുന്നതിനുള്ള സേവനം ലഭ്യമാകുക. അടുത്ത ഘട്ടത്തില് പുരുഷന്മാര് ഉള്പ്പെടെയുള്ള മുഴുവന് ഗാര്ഹിക തൊഴിലാളികള്ക്കും സേവനം ലഭ്യമാക്കുമെന്നും മന്ത്രാലയം വ്യക്തമാക്കി.
ന്യൂസ്റൂം വാര്ത്തകളും തൊഴില് സംബന്ധമായ അറിയിപ്പുകളും മുടങ്ങാതെ ലഭിക്കാന് ഇതുവരെ ന്യൂസ്റൂം ഗ്രൂപ്പുകളില് അംഗങ്ങളല്ലാത്തവര് മാത്രം ജോയിന് ചെയ്യുക- https://chat.whatsapp.com/CqJci12yE9VL8MZgKZYvGm
ന്യൂസ്റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F