November 06, 2023
November 06, 2023
കുവൈത്ത് സിറ്റി: 2026 ലോകകപ്പ് യോഗ്യത മത്സരത്തിൽ കുവൈത്തിനെ നേരിടാൻ ഇന്ത്യൻ ടീം. നവംബർ 16നാണ് മത്സരം. മത്സരത്തിനായി നവംബർ 14ന് ഇന്ത്യൻ ടീം കുവൈത്തിലെത്തും. പരിശീലനത്തിനായി ബുധനാഴ്ച (നവംബർ 8) ഇന്ത്യൻ ടീം ദുബായിലെത്തും. ദുബായിൽ നിന്നാകും കുവൈത്തിലേക്ക് ടീം എത്തുന്നത്. ലോകകപ്പ് യോഗ്യത മത്സരത്തിൽ ഗ്രൂപ് ‘എ’യിലെ ഇന്ത്യ-കുവൈത്ത് മത്സരമാണ് 16ന് നടക്കുക.
കുവൈത്തിലെ ജാബിർ അൽ അഹമ്മദ് ഇന്റർനാഷനൽ സ്റ്റേഡിയത്തിൽ വൈകീട്ട് ഏഴിനാണ് മത്സരം. ഇന്ത്യൻ ടീമിന്റെ 28 അംഗ സാധ്യതപട്ടികയിൽ സുനിൽ ഛേത്രി, ഗുർപ്രീത് സിങ് സന്ധു, സന്ദേശ് ജിങ്കാൻ എന്നിവരുൾപ്പെടെ പ്രമുഖ താരങ്ങളുമുണ്ട്. മലയാളികളായ സഹൽ അബ്ദുൽ സമദും കെ.പി. രാഹുലും സാധ്യത ടീമിലുണ്ട്. അമരീന്ദർ സിങ്, ഗുർപ്രീത് സിങ് സന്ധു, വിശാൽ കൈത് എന്നിവരാണ് ഗോൾ കീപ്പർമാർ.
ആകാശ് മിശ്ര, ലാൽചുങ്‌നുംഗ, മെഹ്താബ് സിങ്, നിഖിൽ പൂജാരി, രാഹുൽ ഭേക്കെ, റോഷൻ സിങ് നൗറെം, സന്ദേശ് ജിങ്കാൻ, സുഭാശിഷ് ബോസ് എന്നിവരിൽനിന്നാകും പ്രതിരോധനിര. മധ്യനിരയിൽ അനിരുദ്ധ് ഥാപ്പ, ബ്രൻഡൻ ഫെർണാണ്ടസ്, ഗ്ലാൻ പീറ്റർ മാർട്ടിൻസ്, ലാലെങ്മാവിയ, ലിസ്റ്റൺ കൊളാസോ, മഹേഷ് സിങ് നൗറെം, നന്ദകുമാർ ശേഖർ, രോഹിത് കുമാർ, സഹൽ അബ്ദുൽ സമദ്, സുരേഷ് സിങ് വാങ്ജാം, ഉദാന്ത സിങ് എന്നിവർ ടീമിലുണ്ട്. ഇഷാൻ പണ്ഡിത, ലാലിയൻസുവാല ചാങ്‌തെ, മൻവീർ സിങ്, കെ.പി. രാഹുൽ, സുനിൽ ഛേത്രി, വിക്രം പ്രതാപ് സിങ് എന്നിവരാണ് ഫോർവേഡ് പട്ടികയിലുള്ളത്.
ഖത്തർ, അഫ്ഗാനിസ്താൻ എന്നിവരാണ് ഗ്രൂപ്പ് എയിലെ മറ്റു ടീമുകൾ. ഗ്രൂപ്പിലെ ആദ്യ രണ്ടു സ്ഥാനക്കാർ 2027ൽ സൗദിയിൽ നടക്കുന്ന ഏഷ്യൻ കപ്പിലേക്ക് യോഗ്യത നേടും. ഒന്നും രണ്ടും സ്ഥാനക്കാർ 2026 ലോകകപ്പ് യോഗ്യത മത്സരങ്ങളുടെ മൂന്നാം റൗണ്ടിലും പ്രവേശിക്കും.
ന്യൂസ്‌റൂം വാര്‍ത്തകളും തൊഴില്‍ സംബന്ധമായ അറിയിപ്പുകളും മുടങ്ങാതെ ലഭിക്കാന്‍ ഇതുവരെ ന്യൂസ്‌റൂം ഗ്രൂപ്പുകളില്‍ അംഗങ്ങളല്ലാത്തവര്‍ മാത്രം ജോയിന്‍ ചെയ്യുക- https://chat.whatsapp.com/CqJci12yE9VL8MZgKZYvGm
ന്യൂസ്‌റൂം വാട്സ്ആപ്പ് ചാനലിൽ ജോയിൻ ചെയ്യുക - https://whatsapp.com/channel/0029Va9k1sH3rZZiZHLfLm0F
